«Դինո Գոլդ Մայնինգ Քամփնի» ընկերության Շահումյանի հանքում փետրվարի 8-ի վաղ առավոտյան տեղի ունեցած դժբախտ պատահարի ժամանակ մահացած 33-ամյա Արմեն Եղիազարյանի դին կտեղափոխվի Սիսիան։
Արմենը Սիսիանից է, ու 7 տարի է, ինչ ձեռնարկությունում հորատող է աշխատում։ Նա ամուսնացած է, ունի 2 երեխա։
Առաջին հերթափոխի աշխատողները, ովքեր Արմենի հետ էին աշխատում, ասում են, որ նա ընկել է քար տեղափոխող մեքենայի տակ։
«Դինո Գոլդ Մայնինգ Քամփնի»-ին առայժմ մանրամասներ չի հաղորդում։ Պատահարի և Ա. Եղիազարյանի մահվան հանգամանքների մասին որոշակի տեղեկություններ կլինեն միայն 10 օրից։ Հավանաբար, այդ ժամանակ էլ Հայաստանի տեխնիկական անվտանգության ազգային կենտրոնը կտա իր եզրակացությունը:
Նշենք, որ ձեռնարկությունը, բացի ապահովագրական գումարներից, ֆինանսական օժանդակություն է ցույց տվել տուժածի ընտանիքին։