Երեկ ԱԺ նախագահ Հովիկ Աբրահամյանը հայտարարել է, թե կողմնակից է, որպեսզի 2008 թ. Մարտի 1-ի դեպքերի առնչությամբ բանտերում գտնվող բոլոր անձինք ազատ արձակվեն՝ բացի հանցագործներից: Փաստացիորեն Աբրահամյանը խոստովանել է, որ բանտերում են գտնվում անմեղ մարդիկ:
ՀՅԴ Գերագույն մարմնի ներկայացուցիչ Արմեն Ռուստամյանը ևս զարմացավ, թե ինչ գործ ունեն բանտերում հանցանք չգործած մարդիկ.
«Ի՞նչ է նշանակում հանցանք չգործածների նկատմամբ համաներում անել. հանցանք չգործածներից պետք է ներողություն խնդրենք, ոչ թե նրանց ներենք: Հաճախ բաներ ենք ասում՝ չխորանալով դրանց մեջ»:
Ռուստամյանի խոսքերով, համաներումը հենց ենթադրում է, որ կան գործած մեղքեր, բայց, ելնելով քաղաքական նպատակներից և ինչ-ինչ հարցերից, ներում են շնորհում: «Վերջին համաներումը ի սկզբանե սխալ էր, կիսատ-պռատ: Այս համաներումը կապված էր մարտի 1-2-ի դեպքերի հետ և այդ դեպքում պետք է առնչվեր բոլորին, և բոլորին պետք է ազատ արձակեին, անկախ նրանից՝ ինչ հանցանք են գործել այդ մարդիկ»,- կարծիք հայտնեց Ռուստամյանը և հավելեց, որ այս հարցը պետք է ավարտվեր՝ բոլորին ազատ արձակելով:
