«Ո՛չ լցնելու ենք, ո՛չ կեղծելու ենք, ո՛չ էլ կաշառելու ենք: Միայն համոզելու ենք, բացատրելու ենք մեր ժողովրդին մեր ծրագիրը, ի վերջո, մեր ժողովուրդն է, մենք միասին ենք եղել 120 տարի և լինելու ենք, մինչև մեր բոլոր հարցերը լուծվեն»,- առաջիկա խորհրդարանական ընտրություններում Դաշնակցության կատարելիք քայլերի մասին խոսելով՝ ասաց ՀՅԴ Գերագույն մարմնի ներկայացուցիչ Արմեն Ռուստամյանը:
Ռուստամյանը տեղեկացրեց, որ իրենք սկսել են ընտրական իրավունքի շարժում նախաձեռնությունը, որի նպատակն է հաստատել ժողովրդի իշխանությունը ընտրական իրավունքի իրացման միջոցով, առանց ցնցումների և արյունալի հեղափոխությունների. «Կարևոր չէ, թե ընտրողն իր ձայնն ում կտա, կարևորն այն է, որ ընտրողն իր ձայնը կարևորի, ինչն էլ կկանխի իշխանությունների վերարտադրելիությունը»:
Ռուստամյանը նշեց, որ սա պետք է լինի հասարակական բնույթ ունեցող վերկուսակցական շարժում, որպեսզի իր իրական նպատակին ծառայի:
Անդրադառնալով այն դիտարկմանը, թե երկպալատ խորհրդարանի գաղափարը իշխանական նվեր է Դաշնակցությանը՝ Ռուստամյանն ասաց. «Մեր գաղափարը մեզ նվիրել պետք չէ»:
Ռուստամյանը նշեց, որ Սփյուռքը ոչ միայն Ցեղասպանության և Լեռնայն Ղարաբաղի հարցերով պետք է զբաղվի, այլ նաև Հայաստանի ներքին հարցերով, որոնք ոչ պակաս համահայկական կարևորություն ունեն: