Դատավոր Ուիլյամ Ալեքսանդրը զգալի կրճատել է փոխհատուցման չափը, որը պետք է Վիրջինիա նահանգը և տեղի տեխնոլոգիական համալսարանը վճարեին 2007 թ. տեղի ունեցած երկու հրաձգության զոհերի ընտանիքներին։ Այս մասին հաղորդում է Associated Press-ը:
Դատարանի որոշման համաձայն՝ Ջուլի Փրայդի և Էրին Փիթերսոնի ընտանիքները կստանան ոչ թե յուրաքանչյուրը 4 մլն դոլար փոխհատուցում, ինչպես որ նախկինում խորհուրդ էին տվել ատենակալները, այլ միայն 100 հազար: Իրենք՝ սպանվածների ազգականները պահանջում էին վճարել յուրաքանչյուրին 10 մլն դոլար:
Դատավարությանը մասնակից իրավաբանների խոսքերով՝ դրանով, սակայն, ամեն ինչ չի ավարտվում, քանի որ և՛ նահանգը, և՛ ընտանիքները պատրաստվում են վճիռը բողոքարկել Վիրջինիայի Գերագույն դատարան:
Ազգականները կպահանջեն պատասխանատվության ենթարկել Չարլզ Ստեգերին, ով 2007 թ. տեխնոլոգիական համալսարանի նախագահն էր, որտեղ տեղի էր ունեցել հրաձգությունը: Հարազատները պատրաստվում են նրան մեղադրել հանցագործ անտարբերության մեջ: Նրանց կարծիքով՝ սպանության զոհերը կարող էին ողջ մնալ, եթե նրանց ժամանակին զգուշացնեին, որ համալսարանի տարածքում զինված մարդ է շրջում:
Նահանգն իր հերթին հայտարարել է, որ չի պատրաստվում որևէ փոխհատուցում վճարել, քանի որ համալսարանի աշխատակիցները պարտավոր են հետևել համալսարանի տարածքում մարդասպանների տեղաշարժին:
2007 թ. ապրիլի 16-ին ծնունդով Հարավային Կորեայից Հո Սին Հին կրակ էր բացել Վիրջինիայի պոլիտեխնիկական համալսարանի ուսանողների վրա՝ սպանելով 32 մարդու, որից հետո ինքնասպան էր եղել: Դրանից հետո նահանգը զոհերի հարազատների համար հատկացրեց 11 մլն դոլար փոխհատուցում, սակայն Փրայդ և Փիթերսոն ընտանիքները հայտարարեցին, որ իրենց դա չի բավարարում և առանձին հայց ներկայացրեցին:
