Աշխատանքային շաբաթվա առաջին օրը` երկուշաբթին, լարված ու ծանր օր էր Սյունիքի մարզպետարանի յոթ վարչությունների, վեց բաժինների ու չորս ծառայությունների պետերի համար: Նրանք, գործող կարգի համաձայն, Սյունիքի մարզպետին ներկայացրին իրենց տարեկան հաշվետվությունները: Սուրիկ Խաչատրյանի առանձնահատուկ գնահատականին արժանացան մասնավորապես ֆինանսական և սոցիալ-տնտեսական զարգացման, առողջապահության և սոցիալական ապահովության, տարածքային կառավարման, կրթության, մշակույթի և սպորտի վարչությունները:
Մարզպետը գյուղատնտեսության և բնապահպանության վարչության աշխատանքը անբավարար գնահատեց:
«Իրականությանը չեն համապատասխանում անասնագլխաքանակի մասին եղած տվյալները, և բավարար չեն այս ուղղությամբ կատարվող աշխատանքները: Էլ չեմ խոսում վարչության կողմից բնապահպանության ոլորտում արված աշխատանքների մասին»,- դժգոհեց Սուրիկ Խաչատրյանը:
Առողջապահության և սոցիալական ապահովության վարչությանը հանձնարարվեց այս տարի հատկապես ուշադրություն դարձնել մանկական մահացածության դեպքերին: Նախորդ տարի մարզում արձանագրվել էր 0-1 տարեկան երեխաների մահացության 17 դեպք: Ամեն մի մահվան դեպքի համար պատասխանատվության պետք է կանչել բժշկին: Վարչության առջև խնդիր դրվեց մարզում բժշկական կադրերի պակասը լրացնելու համար ուղեգրերով բուհեր գործուղված երիտասարդներին հետ բերել մարզ ու աշխատանքով ապահովել:
Մարզպետարանի մյուս վարչությունների, ինչպես նաև մարզպետարանի բաժինների ու ծառայությունների աշխատանքը մարզպետի կողմից գնահատվեց բավարար: