Ժողովրդական կուսակցության նախագահ Տիգրան Կարապետյանը պատրաստվում է առաջիկայում հանրահավաքների շարք սկսել: Այդ մասին նա այսօր հայտարարեց մամուլի ասուլիսի ժամանակ: Տիգրան Կարապետյանն ակնկալում է, որ այդ հանրահավաքներին ակտիվ մասնակցելու են երիտասարդները: Նա տեղեկացրեց, որ ինքը պահանջելու է անցկացնել Ազգային ժողովի արտահերթ ընտրություններ, քանի որ վստահ է, որ այդ ընտրությունները կվերահսկվեն ժողովրդի կողմից:
Լրագրողները հետաքրքրվեցին՝ ճի՞շտ է, որ Վոլգոգրադի հրեական համայնքի ներկայացուցիչները հայտարարել են, որ Տիգրան Կարապետյանի դեմ ունեն ոչ նպաստավոր փաստեր: Տիգրան Կարապետյանն արձագանքեց, թե հրեաներն իր մեջ վտանգ են տեսնում, քանի որ ինքը հայտարարել է, որ Եգիպտոսում գործող նախագահի կողմից ժողովրդին ծեծողները եղել են հրեաներ:
«Ես էլ իրենց մեջ եմ վտանգ տեսնում, այնպես որ` այդ սերը փոխադարձ է»,- ասաց Տիգրան Կարապետյանը: Ավելի ուշ նա հավաստիացրեց, որ ինքը հրեա ազգի դեմ ոչ մի վերապահում չունի: Տիգրան Կարապետյանը վստահեցրեց, որ Ժողովրդական կուսակցությունը մասնակցելու է բոլոր ընտրություններին, և հույս հայտնեց, որ իրենց թեկնածուն լինելու է Տիգրան Կարապետյանը: Տիգրան Կարապետյանն ասաց, որ եթե որևէ մեկն ուրախանում է, որ ԱԼՄ-ն փակել են, ուրեմն նա թշնամի է:
«Նորմալ մարդը ո՞նց կարող է ուրախանալ, որ 84 ընտանիք մնացել են առանց աշխատանքի»,- ասաց նա: Հարցին, թե հնարավո՞ր է, որ Ռոբերտ Քոչարյանը վերադառնա քաղաքականություն, Տիգրան Կարապետյանը պատասխանեց. «Ինձ թվում է` այո»:
Նա ասաց, որ Ռոբերտ Քոչարյանն այսօրվա իշխանական համակարգում ունի հետևորդներ, որոնց վրա կարող է հենվել, եթե ցանկանա:
