Associated Press գործակալությունը փոխանցում է, որ Միացյալ Նահանգները պատրաստվում են մինչև այս տարվա հուլիս ճանաչել Հարավային Սուդանի անկախությունը: Այս մասին հայտարարել է ԱՄՆ նախագահ Բարաք Օբաման: Նա հայտարարել է նաև, որ հանրաքվեն հաջող է անցել, և ինքը «ոգևորված է նրա արդյունքներով»:
Մենք արդեն տեղեկացրել էինք, որ Հարավային Սուդանում հունվարի 9-15-ը տեղի էր ունեցել հանրաքվե, որի արդյունքում հարավցիների 98.83%-ը կողմ են քվեարկել կենտրոնից առանձնանալու օգտին:
Երեկ այս հարցով հանդես է եկել նաև ԱՄՆ պետքարտուղար Հիլարի Քլինթոնը, որը հայտարարել է, որ հիմա ԱՄՆ պատրաստվում է Սուդանին հանել ահաբեկչությանն աջակցող երկրների շարքից: Այս քայլով ԱՄՆ-ն ցույց է տալիս, որ բավարարված է Սուդանի և նրա նախագահ Օմար Ալ-Բաշիրի գործողություններով, որոնք չխոչընդոտեցին Հարավայաին Սուդանի հանրաքվեին:
Հիշեցնենք նաև, որ Օմար Ալ-Բաշիրի նկատմամբ Հաագայի դատարանը գործ է հարուցել` մարդկության դեմ գործած հանցագործության մեղադրանքով:
