Հունիսի 19-ին Լատվիայում ՀՀ դեսպան Արա Այվազյանն իր հավատարմագրերն է հանձնել Լատվիայի Հանրապետության Նախագահ Անդրիս Բերզինշին:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ հանձնման արարողությանը հաջորդած առանձնազրույցի ընթացքում լատվիական պետության ղեկավարն ու Հայաստանի դեսպանը քննարկել են քաղաքական երկխոսության շարունակական խորացման ու երկկողմ հարաբերությունների հետագա զարգացման հեռանկարները, ինչպես նաև երկու երկրների փոխգործակցության հետագա ծավալումը միջազգային կառույցների շրջանակներում:
Կարևորելով Հայաստանի եվրոինտեգրման գործընթացում արձանագրած առաջընթացը` Նախագահ Բերզինշն իր երկրի պատրաստակամությունն է հայտնել այսուհետ ևս ցուցաբերել հնարավոր աջակցություն: Լատվիայի նախագահի խնդրանքով, դեսպան Այվազյանը ներկայացրեց Լեռնային Ղարաբաղի հիմնահարցի խաղաղ կարգավորման գործընթացի վերջին զարգացումները:
Ռիգայում գտնվելու ընթացքում Հայաստանի դեսպանը հանդիպել է նաև Լատվիայի խորհրդարանի փոխխոսնակ Անդրեյս Կլեմենտևսի, ինչպես նաև Կրթության և գիտության նախարար Ռոբերտս Կիլիսի հետ: