Ֆրանսիայի սպորտի նորանշանակ նախարար Վալերի Ֆորնեյրոնը ցանկանում է «Ֆորմուլա-1»-ի օրացույց վերադարձնել երկիր: Հիշեցնենք, որ Ֆրանսիայի նախորդ նախագահ Նիկոլա Սարկոզիի վարչարարական ապարատի աշխատակիցներն ակտիվ գործունեություն էին ծավալել, որպեսզի «Պոլ Ռիկար» վազքուղին 2013 թվականի Ֆրանսիայի Գրան պրի անցկացնելու վայր հանդիսանա:
Սակայն Ֆրանսուա Օլանդի` իշխանության գալու հետ աշխատանքներն այդ ուղղությամբ դադարեցվեցին: Այնուամենայնիվ, վերջերս Ֆորնեյրոնը հանդիպում է ունեցել «Պոլ Ռիկար»-ի ղեկավարների, ինչպես նաև Նևր տարածաշրջանի (որտեղ տեղակայված է «Մանի Կուր մայրուղին) ներկայացուցիչների հետ: Հենց «Մանի Կուր»-ն է 2008 թվականին ընդունել Ֆրանսիայի վերջին Գրան պրին:
«Երբ տեսնում ենք, թե ինչ է անում Ռոմեն Գրոժանն ու ավտոարշավների համբավը, ապա ստիպված ենք լինում խոստովանել, որ մենք կցանկանայինք անցկացնել «Ֆորմուլա-1»-ի Գրան Պրին»,-RMC Sport-ը մեջբերում է Ֆորնեյրենի խոսքերը: