Երկուշաբթի` փետրվարի 7-ին, ժամը 13:00-ից Երևան-Մեղրի ավտոճանապարհի Գորիս-Սիսիան հատվածն ամբողջությամբ բաց է և երթևեկելի:
Հիշեցնենք, որ Հարժիսի խաչմերուկից մինչև Գորիս ընկած հատվածը փետրվարի 6-ի առավոտյան ժամը 4-ից փակ էր ձնաբքի պատճառով։ Միայն 13 ժամ հետո ժամանակավորապես վերականգնվեց երթևեկությունը, այն էլ միակողմանի:
Ճանապարհի այդ հատվածը սպասարկող Գորիսի «Ոսմար» ընկերության աշխատակիցները չէին հասցնում մաքրել ձյունը, քանի որ քամին մեծ արագությամբ ճամփեզրից ձյունը լցնում էր մայրուղու վրա:
Սյունիքի մարզպետարանի տրանսպորտի բաժնի պետ Սարիկ Աղաբեկյանը տեղեկացրեց, որ նման դեպքերից խուսափելու համար անհրաժեշտ է փայտյա արգելապատնեշներ կառուցել: Բազմիցս կառավարություն են դիմել, բայց մերժվել են` ֆինանսների բացակայության պատճառաբանությամբ:
Մարզպետարանի տրանսպորտի և ճանապարհաշինության բաժնի կողմից կատարված ուսումնասիրությունները պարզել են, որ 100 մլն դրամ է հարկավոր` 10,2 կմ երկարությամբ արգելապատնեշներ կառուցելու համար: