ԱԺ նախկին պատգամավոր, ազատամարտիկ Մյասնիկ Մալխասյանը այսօր www.1in.am-ի հետ զրույցում նշեց, որ Հոկտեմբերի 27-ի ոճրագործությունից 11 տարի անց էլ իրեն հուզում է նույն հարցը` «27-ը մնացել է չբացահայտված»: «Ժողովուրդը չի կարող կուլ տակ Հոկտեմբերի 27-ը, ինչպե՞ս կարող է կուլ տալ: 27-ը հնարավոր էլ չէ կուլ տալ: Իմ մտահոգությունները կփարատվեն, երբ Հոկտեմբերի 27-ի իրական կազմակերպիչները կանգնեն դատարանի առաջ: Դա կլինի այն ժամանակ, երբ երկրում իշխանափոխություն տեղի ունենա»,- նշեց Մալխասյանը:
Սմբատ Այվազյան. «Փորձելու ենք կա՛մ բացահայտել, կա՛մ վրեժը լուծել»
Սմբատ Այվազյանին ամենաշատը մտահոգում է այն հարցը, որ «մեր երկիրը այսօր գնում է դեպի ճահիճ»:
«Հանրապետություն» կուսակցության քաղխորհրդի անդամ Սմբատ Այվազյանը, այսօր www.1in.am-ի հետ զրույցում անդրադառնալով Հոկտեմբերի 27-ին, ասաց, որ ամենաշատը մտահոգում է այն հարցը, որ «մեր երկիրը այսօր գնում է դեպի ճահիճ»: «Ճահճի մեջ ավելի է խորանում: Այն երկիրը, որը պատկերացնում էր Վազգենը, բացարձակապես նմանություն չունի այսօրվա երկրի հետ: Ես ինքս ամաչում եմ, որովհետեւ անցել է 11 տարի, եւ ոչ մի բան այդ ոճրագործությունից չի բացահայտվել: Բացարձակապես չի բացահայտվել, եւ բոլոր գլխավոր մեղավորները դրսում են»,- նշեց Սմբատ Այվազյանը: Մեր այն հարցին էլ, թե արդյո՞ք մարդիկ կուլ տվեցին Հոկտեմբերի 27-ը, Այվազյանը պատասխանեց. «Քանի կենդանի ենք, փորձելու ենք կամ բացահայտել, կամ վրեժը լուծել, ինչ-որ մի բան պետք է անել, այսպես աննամուս ապրելն էլ բանի նման չէ»: