ՀՀ ԱՆ գլխավոր ինֆեկցիոնիստ Արա Ասոյանը ամռան ամիսներին խորհուրդ է տալիս քիչ օգտագործել մսեղեն: Այսօր ասուլիսի ընթացքում նա ասաց, որ ձմռան սննդակարգն ամռանը օգտագործելը վտանգավոր է, քանի որ օրգանիզմը չի կարողանում մարսել յուղոտ սննդամթերքը.
«Աշխատեք հեռու մնալ չալաղաջներից, կրեմով խմորեղեններից, ավելի լավ է օրական մածուն օգտագործել, մրգեր, բանջարեղենային կերակուրներ»:
Խոսելով դրսում վաճառվող սննդամթերքի մասին՝ պրն Ասոյանն ասաց, որ զարմանում է, թե ինչպես են մեր քաղաքացիները արևի տակ տաքացած սնունդ գնում, վաճառվող խմորեղենների հետ գնում են նաև ճանճեր:
Ինչ վերաբերում է թունավորման դեպքերին, Արա Ասոյանը հայտարարեց, որ այժմ հիվանդանոցում որևէ թունավորման դեպքով հիվանդ չկա:
Նա նաև խորհուրդ տվեց ամեն օր օգտագործել 1-1,5 լիտր ջուր, եթե հնարավոր է՝ կոլայի և գազավորված խմիչքների փոխարեն օգտագործել մրգահյութեր. «Սննդամթերքն ունի իր պահպանման կանոնները: Միշտ թունավորումները լինում են այն սննդամթերքներից, որոնք սխալ են մշակվում և պահպանվում: Աշխատեք նաև յուղոտ թթվասեր և կաթ քիչ օգտագործել»:
