Քաշային 2 կարգերում աշխարհի նախկին չեմպիոն Դևիդ Հեյը հայտարարել է, որ վերջնական որոշում է կայացրել ավարտել կարիերան Դերեք Չիսորայի հետ հուլիսի 14-ին կայանալիք մենամարտից հետո, եթե հնարավորություն չունենա հաջորդ մենամարտն անցկացնել WBC վարկածով գերծանր քաշային կարգում աշխարհի չեմպիոն Վիտալի Կլիչկոյի հետ:
«Կլիչկոյի մենեջերն ասում էր, որ Հեյ-Չիսորա մենամարտի հաղթողը, այսինքն ես, կարող է իր հաջորդ մենամարտն անկացնել Վիտալիի հետ: Այժմ նա ուրիշ հակառակորդ է ընտրել, չգիտեմ անգամ, թե ով է, Չար է անունը: Նրանք գիտեն, որ Վիտալին նրան նոկաուտի կենթարկի,վերջնականապես լավ տպավորություն կստեղծի և հաղթանակած դուրս կգա քաղաքականության ասպարեզ:
Վլադիմիրն ասում էր, որ չի ցանկանում կրկին հանդիպել ինձ: Կարծում եմ `դա արդարացի չէ, իսկ ռևանշը տեղին կլիներ: Այն Վլադիմիրի հետ կկայանար միայն Վիտալիի հետ իմ մենամարտի ու հաղթանակի դեպքում:
Չեմ մտածել, թե ինչ եմ անելու Չիսորայի հետ մենամարտից հետո, սակայն եթե Կլիչկոյի հետ մենամարտը չկայանա, կավարտեմ կարիերաս»,- Boxing Scene-ը մեջբերում է բռնցքամարտիկի խոսքերը:
