Այսօր ԱԺ նախագահ Հովիկ Աբրահամյանը անակնկալ մատուցեց լրագրողներին և պատրաստակամություն հայտնեց սիրով պատասխանել բոլորի հարցերին:
Անդրադառնալով լրագրողների այն հարցին, թե իր խնամի Գագիկ Ծառուկյանը ո՞ւմ կսատարի 2013 թվականի ընտրություններում, նա ասաց, որ դա Գագիկ Ծառուկյանի որոշելիքն է, սակայն, իր կարծիքով, լավ կլիներ, որ պաշտպաներ Սերժ Սարգսյանի թեկնածությունը։
ԱԺ նախագահը նաև հերքեց այն խոսակցությունները, թե առաջիկայում պատրաստվում է հեռանալ ՀՀԿ-ից և դառնալ ԲՀԿ անդամ, ինչպես նաև խորհուրդ տվեց, որ լրագրողները խնամիական հարաբերությունները չխառնեն քաղաքականության հետ:
Իսկ լրագրողների հարցին՝ «եթե 2013 թվականին առաջադրվեն և՛ Սերժ Սարգսյանը, և՛ Գագիկ Ծառուկյանը, ինքն ո՞ւմ կընտրի», Հովիկ Աբրահամյանը պատասխանեց, որ կընտրի Սերժ Սարգսյանին, և ավելացրեց, թե իրենք պայմանով չեն խնամի դարձել՝ որ նախագահական ընտրություններին ինքը պետք է պաշտպանի Գագիկ Ծառուկյանի թեկնածությունը:
Նա նշեց, որ ԲՀԿ-ն 2008 թվականին պաշտպանել է Սերժ Սարգսյանի թեկնածությունը, և ավելացրեց, որ իր տեսակետով, այս անգամ ևս ճիշտ կլինի, եթե նորից պաշտպանի Սերժ Սարգսյանի թեկնածությունը։
Իսկ 2013 թվականին նախագահի թեկնածու լինելու է Սերժ Սարգսյանը. հայտարարեց Հովիկ Աբրահամյանն ու լրագրողներին առաջարկեց դրանից չզարմանալ: