Արտեմ Հարությունյանին մտահոգում է, որ Սփյուռքում կան հայեր, ովքեր զբաղված են Հայաստանը վարկաբեկելով:
«Ռուդիկ անունով մեկը, որը փախել է Հայաստանից, իրեն արդարացնելու համար երեք-չորս օրը մեկ կեղտաջուր է լցնում, թե Հայաստանում խարդախներ են, մարդասպաններ են: Այդ անվերջ կեղտը լցնելով` նման մարդիկ կարծիք են ձևավորում, որ ինչքան էլ փող տաս, միևնույն է, կորած է: Նրանք են խանգարում, որ սփյուռքահայությունը ամբողջ ուժերով լծվի հայությանն օգնելու գործին»,- ասաց նա:
Ավիկ Իսահակյանը կարծում է, որ Սփյուռքը բազմակուսակցական մարմին է, և պետք չէ այնպես անել, որ պառակտման հիմք դրվի: Նա նշեց, որ պետք է բոլոր կուսակցությունները ներկայացված լինեն երկպալատ խորհրդարանի վերին պալատում: Արտեմ Հարությունյանն էլ կարծում է, որ մենք պետք է խարիսխ նետենք ամերիկյան որևէ կազմակերպությունում:
«Առաջին լրատվականը» Արտեմ Հարությունյանին հակադարձեց, որ իր նշած սփյուռքահայերը ոչ թե հայ ժողովրդին են վարկաբեկում և ներկայացնում որպես խարդախ և մարդասպան, այլ իշխանություններին: «Համաձայն եմ, Դուք շատ ռադիկալ մոտեցում ունեք, արմատական: Բայց ղեկավարության մեջ էլ կան նվիրյալ և ազնիվ մարդիկ, և պետք չէ բոլորին վարկաբեկել»,- ասաց Արտեմ Հարությունյանը:
Հետո նա մտահոգություն հայտնեց առ այն, որ կան որբ երեխաներ, ընտանիքներ, որոնք հաց ու պանիր էլ չեն կարողանում հայթայթել, բայց այդ ամենը մեր օլիգարխներին չի հետաքրքրում. նրանք իրենց գարաժի ու «Տոյոտա»-ի մասին են մտածում:
Արտեմ Հարությունյանը կարծում է, որ արտերկրում պետք է գործի սփյուռքահայության կենտրոն, իսկ Հայաստանում սփյուռքահայերին մեկտեղելու փորձերը կվերածվեն հերթական ճահճոտ, բյուրոկրատական ապարատի: