Սիսիանում զոհված ազատամարտիկների հարազատները, ԵԿՄ անդամները վրդովված են: Պատճառը Արցախյան պատերազմի զոհերի պանթեոնում երեկ գիշերը ժամը 1:30-ին տեղի ունեցած միջադեպն է։
Ինչպես տեղեկացնում է «Ա1+»-ը, ականատեսների փոխանցմամբ` Սիսիանի Նորավան գյուղում տեղակայված զորամասի թիկունքի գծով տեղակալ, մայոր Պարոնյանը յուրօրինակ ձևով է փորձել հարգանքի տուրք մատուցել զոհված ազատամարտիկների հիշատակին։ Նա հարբած` «ՆԻՎԱ» մակնիշի ավտոմեքենայով բարձրացել է պանթեոնի աստիճաններով։ Նրան փորձել են կանգնեցնել հարևանությամբ ապրող մարդիկ:
«Ես իրեն ասում եմ` գիտե՞ս, էստեղ մարդիկ, անգամ գեներալներ, նախարարներ են այցելում և աստիճանները, ի տարբերություն քեզ, ոտքով ու խոնարհված են բարձրանում: Ասաց՝ ես խոնարհվելու իմ ձևն ունեմ, իմ ձևն էլ ըսենց ա։ Զնակ չկա, ուրեմն կարամ ավտոյով բարձրանամ, ինձ ոչ մեկ չի կարա կանգնեցնի: Ես պիտի լինեմ առաջինը, ով ավտոյով կբարձրանա էս աստիճաններով»,- պատմում է զորամասի հրամանատարի հետ վեճի մեջ մտած երիտասարդը։
«ՆԻՎԱ» մեքենան պանթեոնի կենտրոնում կայանելուց հետո նա արդեն ոտքով բարձրացել է հարևանությամբ գտնվող եկեղեցի և հնչեցրել եկեղեցու զանգերը:
Հարթելով իրավիճակը` հեռացել է, բայց առավոտյան վերադարձել է: «Էկել ա, գոնե ներողություն խնդրի, ասի` դե, հարբած եմ եղել, ասում ա` ապեր, մենք ոնց որ իրար լավ չենք հասկացել: Ասում եմ՝ տեսնո՞ւմ ես՝ ինչ ես արել, ասում ա՝ լավ էլ արել եմ»,- պատմում է ականատեսը:
Պանթեոն տանող աստիճաններին ավտոմեքենայից հոսած յուղից կարելի է ենթադրել, որ մեքենան վնասվել է:
Այսօր Սիսիանի Արցախյան ազատամարտի պանթեոնում հավաքված զոհվածների ընտանիքի անդամները, ԵԿՄ ներկայացուցիչները ցանկանում էին հանդիպել մայորին եւ հարցնել, թե որն է եղել արարքի պատճառը, ինչու է անհարգալից վերաբերմունք ցուցաբերել ազգի ազատագրության համար նահատակված տղաների շիրիմների նկատմամբ:
Զոհվածների ծնողներից մեկը հեռախոսազրույց ունեցավ առաջին բանակային կորպուսի հրամանատար , գեներալ-մայոր Կամո Աղաջանյանի հետ:
Գեներալ-մայորը խոստացավ Գորիսից Սիսիան գալ երկուշաբթի, Սյունիքի մարզպետ Սուրիկ Խաչատրյանի հետ տեղում պատասխանել բոլոր հարցերին:
Պանթեոնում հավաքվածները հեռացան՝ երկուշաբթի ժամը 14:00 կրկին նույն տեղում հանդիպելու պայմանավորվածությամբ:
