Ֆրանսիայի նախկին նախագահ Նիկոլա Սարկոզին որոշել է ապացուցել 2007 թ. նախընտրական քարոզարշավի ապօրինի ֆինանսավորման գործում իր անմեղությունը՝ դատարանին ուղարկելով իր օրագիրը։ Կիրակի օրն այս մասին հաղորդել է Journal du Dimanche թերթը:
Հրատարակության տվյալներով՝ Սարկոզիի փաստաբան Թիերի Էրցոգը դատավոր Ժան-Միշել Ժանտիլին և Բորդո քաղաքի դատախազին ուղարկել է Սարկոզիի օրագրի 2007 թ. սկզբի վավերացված պատճենը: Բնօրինակը փոխանցվել է Փարիզի պրիստավին:
Այդ կերպ նախկին նախագահի պաշտպանությունը, որի դատական անձեռնմխելիության ժամկետը լրացել է ուրբաթ օրը, որոշել է հարված հասցնել L’Oreal-ի սեփականատեր Լիլիան Բեթանկուրի գործի շրջանակներում: Ավելի վաղ գործը հետաքննող դատավոր Ժանտիլը վկաների հարցաքննության հիման վրա կասկածել է, որ Սարկոզին անձամբ է գնացել Բեթանկուրի տուն՝ կանխիկ գումարի հետևից: Այդ գումարներն իբր օգտագործվել են ապագա նախագահի նախընտրական քարոզարշավի համար:
Այն ժամանակվա ՆԳՆ ղեկավար Սարկոզիի օրագրից պարզ է դառնում, որ նա այդ ընթացքում միայն մեկ անգամ է հանդիպել Բեթանկուրի հետ` 2007 թվականի փետրվարի 24-ին: Հանդիպումը տևել է 20-25 րոպե: Ընդ որում՝ ականատեսների վկայությամբ՝ Սարկոզին Բեթանկուրի մոտ գնացել է մարտի վերջին կամ ապրիլի սկզբին:
Նախագահի օրագիրը նրա վրայից կարող է հանել կասկածների միայն մի մասը:
Ինչպես նշում է Journal du Dimanche-ը, հետաքննությանը մոտ կանգնած աղբյուրները չեն բացառում մոտ օրերին նախկին նախագահի տանը խուզարկություն անցկացնելու հնարավորությունը:
