Ըստ 2011 թ. առաջին եռամսյակի դրամավարկային քաղաքականության ծրագրի` 2011 թ. առաջին կեսին Հայաստանում գնաճը, ամենայն հավանականությամբ, կգերազանցի 9.5%-ը: Այսօր լրագրողների հետ հանդիպման ժամանակ ԿԲ դրամավարկային քաղաքականության վարչության պետ Արթուր Ստեփանյանը նշեց, որ եթե ԿԲ-ն չխստացնի դրամավարկային քաղաքականության պայմանները, ապա 2011 թ. վերջին գնաճը կլինի 5.5-7.5% միջակայքի սահմաններում:
Սակայն, ըստ Ստեփանյանի, ԿԲ-ն խստացնելու է դրամավարկային քաղաքականության պայմանները, որի արդյունքում գնաճը 2011 թ. վերջին կլինի 4-5%: «Բայց մոտակա մի քանի ամիսներին կպահպանվի բարձր գնաճային միջավայրը»,- ասաց Ա. Ստեփանյանը:
Հարցին, թե արդյոք ԿԲ-ն իր կանխատեսումներում հաշվի առե՞լ է, որ 2011 թ. ապրիլից գազի գինը կարող է թանկանալ, Ա. Ստեփանյանը պատասխանեց, որ ԿԲ-ն նման բան չէր կարող անել: Նրա խոսքով` քանի դեռ հայտնի չէ՝ արդյոք գազի գինը սպառողների համար կբարձրանա՞, թե՞ ոչ, և եթե բարձրանա` որքա՞ն կբարձրանա, ԿԲ-ն պարզապես չի կարող որևէ գնահատում անել գազի գնի հետ կապված:
