Այսօր հրավիրած մամուլի ասուլիսի ժամանակ անդրադառնալով ՀՀ իշխանությունների՝ երկպալատանի խորհրդարան ստեղծելու մտադրությանը, որում պետք է ներգրավվեն նաև սփյուռքահայեր՝ բանաստեղծ Արտեմ Հարությունյանը նշեց, թե ինքը ժամանակին ողջունել է Սփյուռքի նախարարություն ստեղծելու գաղափարը:
Նա ասաց, որ ապրել է սփյուռքահայերի, մասնավորապես` Օշին Քեշիշյանի, Ալեք Մանուկյանի, Պիտեր Բալաքյանի ընտանիքներում և կարողացել է ներսից ճանաչել սփյուռքը: Արտեմ Հարությունյանն ասաց, որ պետք է ստեղծել սփյուռքի կոմիտե, օրինակ՝ Նյու-Յորքում, և պարտադիր չէ, որ այն ներկայացնի անպայման հայը:
Գրականագետ Ավիկ Իսահակյանն էլ հակադարձեց, թե ազգային-գաղափարական հարցերում օտարերկրացին մեզ չի կարող խորհուրդներ տալ: Նա նշեց, որ այդ մարդիկ կարող են ուղղորդվել այլ պետությունների կողմից: Սրանից զատ, նա կարծիք հայտնեց, որ դեռ պարզ չէ` ինչպես կկոչվի այդ մարմինը` վերին պալա՞տ, թե՞ խորհրդակցական մարմին:
Ավիկ Իսահակյանը, որը պարզվեց, վերջերս շրջագայել է տարբեր երկրներով, այն տպավորությունն է ստացել, որ սփյուռքն ուզում է մասնակցել Հայաստանի ներքին կյանքին: Ինչ վերաբերում է ՀՀ իշխանությունների այդ մտադրությանը, ապա նա կարծիք հայտնեց, որ այդ քայլով Հայաստանի ղեկավարությունն ուզում է նոր կամուրջներ գցել սփյուռքի հետ:
Ավիկ Իսահակյանի կարծիքով` ցանկալի կլիներ սփյուռքահայերի ներգրավվածությունն ապահովել` նախապես ստեղծելով խորհրդակցական մարմին, ինչպիսին այսօր Հանրային խորհուրդն է: Իսկ որպեսզի ստեղծվի երկպալատ խորհրդարան, ըստ Ա. Իսահակյանի, պետք է 2012 թ. ընտրություններից առաջ փոփոխություններ անել Սահմանադրության մեջ:
«Սփյուռքը շատ բարդ, կարծր, վիրավորված, դրամատիկ հասկացություն է»,- այսպես բնորոշեց իր ճանաչած սփյուռքը Արտեմ Հարությունյանը: Նա կարծիք հայտնեց, որ մենք պետք է դեսանտ ունենանք ուղիղ ԱՄՆ սրտում:
/Արտեմ Հարությունյանը՝ աջից/
