Այսօր ԿԲ դրամավարկային քաղաքականության վարչության պետ Արթուր Ստեփանյան լրագրողների հետ հանդիպման ժամանակ ներկայացրեց 2011 թ. առաջին եռամսյակի դրամավարկային քաղաքականության ծրագիրը` նախ և առաջ անդրադառնալով 2010 թ. զարգացումներին:
Նա նշեց, որ արձանագրված աննախադեպ բարձր գնաճը (9.4%) պայմանավորված էր հիմնականում Հայաստանի գյուղատնտեսության և միջազգային շուկաների զարգացումներով: Այսպես, ըստ Ստեփանյանի՝ Համաշխարհային բանկի տվյալներով, պարենային ինդեքսը 2010-ին կազմել է 25%, ինչը ավելի մեծ չափով անդրադարձել է նախ և առաջ զարգացող երկրների (այդ թվում՝ Հայաստանի) գնաճի վրա, քանի որ զարգացող երկրներում սպառողական զամբյուղի մեջ պարենային ապրանքների տեսակարար կշիռը ավելի մեծ է:
Ստեփանյանի խոսքով, մեր 9.4% գնաճի 7.5 տոկոսային կետը պայմանավորվել է հենց պարենային ապրանքների գնաճով: Ընդ որում, այդ 7.5 տոկոսային կետից 5 տոկոսային կետը բաժին է ընկնում Հայաստանի ներքին գործոններով պայմանավորված պարենային ապրանքների գների աճով, և ավելի քան 2 տոկոսային կետը` միջազգային շուկաներում պարենային ապրանքների գնաճով:
Ա. Ստեփանյանը շեշտեց, որ համախառն պահանջարկի ազդեցությունը 2010 թ. գնաճի վրա նշանակալի չէ: Նրա խոսքով` ծառայությունների և արդյունաբերական ապրանքների գները 2010-ին աճել են նպատակային միջակայքի կենտրոնական արժեքին մոտ (4%), ինչը նշանակում է, որ իր ազդեցության տակ գտնվող գործոնները ԿԲ-ի կողմից լիարժեք վերահսկվել են:
