ՀՀ առողջապահության նախարարության հիգիենիկ հակահամաճարակային տեսչության պետ Արտավազդ Վանյանը այսօր ներկայացրեց, թե ինչպիսին է սուր շնչառական հիվանդությունների տարածման պատկերը Հայաստանում:
Վանյանը, համեմատական անցկացնելով, նախ խոսեց աշխարհում տիրող իրավիճակի մասին: Համաշխարհային առողջապահության կազմակերպության հայտարարության համաձայն` այսօր աշխարհում սուր շնչառական հիվանդությունների և գրիպով հիվանդանալու լարվածությունը չափավոր է.
«Այսինքն՝ դա նշանակում է, որ որոշակի ցուցանիշներ կան. բարձր, միջին և ցածր լարվածության: ԱՄՆ-ի մոտ 17 նահանգներում բարձրացում է նկատվել, և տարածված են հիմնականում գրիպի A և B տիպերը: Մոտ 80%-ի դեպքում գրիպի A տիպն է, 20%-ինը` B-ն: Եվրոպայի տարբեր երկրներում իրավիճակը տարբեր է։
Հիմնականում բարձր ցուցանիշ արձանագրվել է Սկանդինավյան երկրներում, վերջերս երկու անգամ բարձրացում է նկատվել Գերմանիայում, Նորվեգիայում, այստեղ նույնպես շրջանառվում են գրիպի տարբեր տիպեր»:
Վանյանն ասաց, որ այս տարի H1N1 գրիպի պանդեմիան ավարտված է, և գրիպը դիտվում է որպես սեզոնային գրիպի ենթատեսակ.
«2010 թ. օգոստոսին Համաշխարհային առողջապահության կազմակերպությունը հայտարարեց անցյալ տարի շրջանառվող H1N1 գրիպի ավարտը, որն էլ վկայում է, որ այս տարի պանդեմիան ավարտված է»:
Հայաստանում սուր շնչառական հիվանդությունների և գրիպի վիճակը գնահատվում է հանգիստ. «Ներկա պահին Հայաստանում իրավիճակը հանգիստ է: Մեր կողմից դեռ հոկտեմբեր ամսից դպրոցներում և մանկապարտեզներում կատարվում է ամենօրյա մոնիթորինգ: Դպրոցներում և մանկապարտեզներում 1-2% հիվանդացություն է արձանագրվում, որը լիարժեք հսկողության տակ է գտնվում»:
Վանյանը վստահեցրեց, որ նկատելի բարձրացում չի դիտվել, և մտահոգության առիթ էլ չկա: Մոնիթորինգ իրականացվում է նաև բոլոր բուժկանխարգելիչ հիվանդանոցներում, ստացիոնարներում, վերակենդանացման բաժանմունքներում և շտապ օգնության բաժանմունքներում. «Ասեմ, որ շտապ օգնության կանչերը անցյալ տարվա համեմատ նվազել են 10-20%-ով: Ստացիոնարներում ունենք թոքաբորբի 6 ծանր դեպք, որոնք հիմնականում ուշացած դեպքեր են»:
Վանյանը խորհուրդ տվեց թեթևակի ախտանշանների դեպքում անմիջապես դիմել բժշկի, չզբաղվել ինքնաբուժմամբ, պարբերաբար օդափոխել այն տարածքը, որտեղ հիվանդ կա և օգտագործել շատ հեղուկներ, չգնել համապատասխան հակավիրուսային դեղամիջոցներ:
Հայաստանում հիմնականում շրջանառվում է գրիպի B տիպը: Մահվան դեպքեր կան գրիպի թե՛ B տեսակից, թե՛ A տեսակից:
