Ինչպես հաղորդում է Associated Press գործակալությունը, ՌԴ Պետդումայի պատգամավոր Աշոտ Եղիազարյանը, որի նկատմամբ քրեական գործ է հարուցվել և հետախուզում հայտարարվել, լրագրողներին ասել է, որ պատրաստվում է քաղաքական ապաստան խնդրել ԱՄՆ-ում:
Նա նշել է, որ վերջին տարիներին իր նկատմամբ ճնշումներ են եղել Ռուսաստանում: Մասնավորապես, անցած տարի դեկտեմբերի 7-ին սպանվել է նրա բարեկամը, որի անունը չի նշել: Բացի այդ, երբ նա փորձել էր մասնակցել «Մոսկվա» հյուրանոցի վերականգնման համար հայտարարված մրցույթին, ստացել է սպառնալիքներ, այդ թվում՝ երեխաների նկատմամբ բռնություններ են խոստացել: Արդյոք այս տեղեկությունները համապատասխանո՞ւմ են իրականությանը՝ դեռ հայտնի չէ: Հավանաբար, այս փաստերը ներկայացնելով` Եղիազարյանը փորձում է հեշտացնել ԱՄՆ-ում ապաստան ստանալու գործընթացը:
Հիշեցնենք, որ Աշոտ Եղիազարյանի նկատմամբ հարուցվել է քրեական գործ, որով նա մեղադրվում է խարդախությամբ 2 մլրդ ռուբլի հափշտակելու մեջ:
Անցած տարվա ամառվանից Եղիազարյանը գտնվում է Լոս Անջելեսում: Նա հայտարարել է, թե կարող է վերադառնալ Ռուսաստան, սակայն վստահ չէ, որ իր իրավունքներին և կյանքին վտանգ չի սպառում:
