The Washington Post-ն այսօր անդրադարձել է Կոնգրեսում Մեթյու Բրայզայի թեկնածության հաստատմանը, որին կրկին փորձելու են խոչընդոտել հայկական լոբբիստական կազմակերպությունների ներկայացուցիչները:
Թերթը հիշեցնում է, որ Ամերիկայի հայկական կազմակերպությունները, որոնք առավել ուժեղ են Կալիֆոռնիայում և Նյու Ջերսիում, պնդում են, որ Բրայզան կանխակալ վերաբերմունք ունի Ադրբեջանի նկատմամբ, որը հակամարտության մեջ է գտնվում Հայաստանի հետ: Չնայած այն հանգամանքին, որ կոնգրեսականներ Բարբարա Բոքստերը և Ռոբերտ Մենենդեսը արգելափակել էին Բրայզային թեկնածությունը, սակայն Օբաման, օգտվելով Սենատում կայացած ընտրություններից, ինչպես նաև այդ դեպքում օրենքով թույլատրված հնարավորությունից, ի վերջո, Բրայզային դեսպան նշանակեց, սակայն՝ մեկ տարի ժամկետով:
Նրա թեկնածությունը, այդուամենայնիվ, պետք է քննարկվի և քվեարկվի Կոնգրեսում առաջիկա մեկ տարվա ընթացքում, այլապես նախագահը ստիպված կլինի հետ կանչել նրան և նոր դեսպան նշանակել:
«Ամերիկայի հայ ընտրողները հերթական անգամ զարմացած են նախագահ Օբամայի կողմից շատ ամերիկահայերի առջև ստանձնած պարտավորությունները չհարգելու կապակցությամբ։ Եվ հիմա էլ, չնայած իր կուսակցությունը ներկայացնող սենատորների առարկություններին, ԱՄՆ նախագահը կրկին ճնշում է գործադրում Սենատի վրա՝ հաստատելու համար Մեթյու Բրայզայի վիճելի և խիստ վարկաբեկված թեկնածությունը»,- ասել է Ամերիկայի Հայ դատի գրասենյակի գործադիր տնօրեն Արամ Սուրեն Համբարյանը:
Համբարյանը հույս է հայտնել, որ սենատորներ Բոքսթերն ու Մենենդեսը, որոնք արգելափակել էին Բրայզայի թեկնածությունը, նույնը կանեն այս անգամ` հարգելով ամերիկյան արժեքները, ԱՄՆ շահերը և ազգային դիվանագիտության վարկը:
