Ռուսական Коммерсант պարբերականը անդրադարձել է վերջերս Վրաստանի «Ազատ դեմոկրատներ» կուսակցության առաջնորդ Իրակլի Ալասանիայի` ԱՄՆ կատարած այցին և այնտեղ ունեցած հանդիպումներին:
Փաստելով, որ Ալասանիան Վաշինգտոնում ունեցել է մի շարք կարևոր հանդիպումներ ազդեցիկ գործիչների, այդ թվում՝ սենատորների հետ, թերթը գրում է, որ ԱՄՆ-ում կարծես արդեն կատարել են իրենց քաղաքական ընտրությունը 2012-2013 վրացական ընտրական գործընթացում: Միևնույն ժամանակ, դա չի նշանակում, որ Վաշինգտոնը հրաժարվում է ներկայիս նախագահ Սաակաշվիլիի հետ համագործակցելուց:
Ալասանիային Վաշինգտոնում հանդիպումներ ունենալու հարցում աջակցել է վրացական դեսպանատունը։ Նա հանդիպել է քաղաքական մի շարք գործիչների, այդ թվում՝ ԱՄՆ վերջին նախագահական ընտրություններում հանրապետական կուսակցության թեկնածու Ջոն Մաքքեյնի հետ: Հանդիպումից հետո Ալասանիան նշել էր, թե համաձայն է, որ Վրաստանում իշխանափոխությունը պետք է տեղի ունենա խաղաղ ճանապարհով:
Սակայն Վրաստանում միանշանակ չեն ընդունվել ամերիկյան նախընտրությունները: Մինչ որոշ գործիչներ կարծում են, որ ՄԱԿ-ում Վրաստանի նախկին դեսպանի այցը դրական քայլ է, որով ամերիկացիները ցույց են տալիս, որ պատրաստ են համագործակցել իսկական ժողովրդավարական ուժերի հետ, ընդդիմադիր մյուս զանգվածը դժգոհում է, որ «ԱՄՆ-ն իրենց նախագահ է նշանակել Սաակաշվիլիին, իսկ հիմա փորձում է նաև ընդդիմություն նշանակել»:
Իրակլի Ալասանիան միջազգային իրավունքի մասնագետ է: 2002-ին նշանակվել է պետանվտանգության նախարարի տեղակալ, երկու տարի անց դարձել է Աբխազիայի արտագնա կառավարության ղեկավար, 2006-2008-ին եղել է Վրաստանի դեսպանը ՄԱԿ-ում և այդ պաշտոնից հրաժարական է տվել՝ ի նշան բողոքի նախագահ Միխեիլ Սաակաշվիլիի կողմից ռուս-վրացական պատերազմից խուսափել չկարողանալու:
Թբիլիսիի քաղաքապետի վերջին ընտրություններում Ալասանիան ստացել է ձայների 20 տոկոսը:
Նա Վրաստանի հակամարտությունների խաղաղ կարգավորման կողմնակից է և այս պատճառով որոշակի վստահություն ունի աբխազական իշխանությունների շրջանում,- գրում է թերթը: