Երկրորդ համաշխարհային պատերազմի ժամանակվա ինքնաթիռը, որը գերմանացի զինվորականները դուրս են բերել Բալթիկ ծովի հատակից, պարզվել է, որ մեկ շարժիչանի ռմբակոծիչ JU 87 Stuka չէ, ինչպես ի սկզբանե ենթադրվում էր, այլ երկու շարժիչանի Junkers 88 է: Այս մասին, ինչպես գրում է Die Welt-ը, հունիսի 15-ին հաղորդել է Դրեզդենի ռազմական պատմության թանգարանի կապիտան Սեբաստիան Բանգերտը:
Այն բանից հետո, երբ ջրի հատակից դուրս են բերել ինքնաթիռի դետալների մեծ մասը, փորձագետները հանգել են այն եզրակացության, որ դա Junkers 88 ինքնաթիռի մնացորդներ են: Ըստ ջրասուզորդների՝ ջրի տակ այդ ինքնաթիռների տարբերությունը հասկանալն անհնար է:
Junkers 88-ն, ի տարբերություն JU 87 Stuka-ի, ավելի խոշոր կորպուս ունի և երկշարժիչանի է:
Junkers ինքնաթիռներն արտադրվել են 1939 թվականից մինչև պատերազմի ավարտը՝ Դեսաուում: Գերմանացիներն արտադրել են ավելի քան 14.8 հազար Junkers 88 ինքնաթիռ` գրեթե երեք անգամ ավելի շատ, քան JU 87 Stuka: Սակայն այժմ մնացել է ընդամենը մի քանի տասնյակ Junkers 88, որոնք գտնվում են ԱՄՆ–ում,Մեծ Բրիտանիայում, Ռուսաստանում, Նորվեգիայում, Հունաստանում և Գերմանիայում:
