Ռուսաստանի հավաքականի պաշտպան Վասիլի Բերեզուցկին Իրանի հավաքականի հետ կայանալիք հանդիպումից առաջ sport-express-ին տված հարցազրույցում անդրադարձել է նաև Հայաստան-Ռուսաստան խաղին։
«Հայաստանի Հանրապետության նախագահ Սերժ Սարգսյանը իր երկրի հավաքականի առջև խնդիր է դրել անպայման հաղթել այդ խաղում։ Դա չափանի՞շ է»։ Լրագրողի հարցին Բերեզուցկին պատասխանել է.
«Նախագահների ցանկությունները հասկանալի են, չնայած հնարավոր է` նրանք իրենց ձգտումներում հասարակ ֆուտբոլիստներիս ոչ հասու գործիքներ են կիրառում, բայց ֆուտբոլում որոշիչ գործիքները ուղղանկյուն դաշտն ու կլոր գնդակն են։ Չեմ կարողանում մտաբերել մի դեպք, երբ որևէ թիմ հրամանով հաղթանակ տոնի։ Իսկ եթե մե՞նք հաղթենք։ Ի՞նչ է, նախագահը պատժամիջոցնե՞ր է կիրառելու խաղացողների նկատմամբ»։
Հայկական մամուլում մեծ աղմուկ բարձրացրած՝ Հայաստան-Ռուսաստան հանդիպման՝ պայմանավորված բնույթ կրելու մասին տեղեկությանն անդրադառնալով` Ռուսաստանի հավաքականի պաշտպանն ասել է, որ դա առաջին դեպքը չէ.
«Դա պարզապես անհեթեթություն է: Երբ մենք հանդիպում ենք ԽՍՀՄ նախկին պետությունների հավաքականների հետ, ոմանք անպայման փորձում են հետաքրքրություն ստեղծել այդ հանդիպման նկատմամբ: Այդպես էր նաև Ադրբեջանի հետ խաղից առաջ և էլի ինչ-որ խաղից առաջ:
Կարծում եմ` պետք չէ, որ ուշադրություն դարձնենք նման հեքիաթներին, առավել ևս՝ հավաքականի ֆուտբոլիստները. այդ ամենը կատարյալ անհեթեթություն է»: