2006թ. այս օրը ՀՀ Ազգային ժողովն ընդունեց նոր`«Հայաստանի Հանրապետության պետական դրոշի մասին» և «Հայաստանի Հանրապետության պետական զինանշանի մասին» օրենքները:
Հայկական դրոշը ՀՀ պետական խորհրդանիշն է: Դրոշը երեք հավասար հորիզոնական զոլերով ուղղանկյուն պաստառ է, վերևում` կարմիր, մեջտեղում` կապույտ, ներքևում` նարնջագույն: Այս գույները դարեր շարունակ նույնացվել են հայ ազգի հետ:
Հայաստանի դրոշն ընդունվել էր 1990թ օգոստոսի 24-ին ՀՀ Գերագույն խորհրդի կողմից, իսկ 2006թ. ՀՀ ԱԺ-ն օրենք ընդունեց դրոշի մասին:
«Հայաստանի Հանրապետության պետական զինանշանի մասին» օրենքն ընդունվել էր Գերագույն խորհրդի կողմից 1992թ. ապրիլի 19-ին: Վերականգնվել է Հայաստանի Առաջին Հանրապետության (1918-1920թթ.) զինանշանը, որի հեղինակներն են ճարտարապետ, Ռուսաստանի գեղարվեստի ակադեմիայի ակադեմիկոս Ալեքսանդր Թամանյանը և նկարիչ Հակոբ Կոջոյանը:
Երկու օրենքները սահմանում էին ՀՀ դրոշի և զինանշանի նկարագրություններն ու գործածման կարգը:
