Ընթացիկ շաբաթում հրապարակվեց 2010թ. 1000 խոշոր հարկատուների ցուցակը: Այս անգամ ևս, ինչպես 2009 թ. էր, Հայաստանի ամենախոշոր հարկատուն «Հայռուսգազարդն է»: Երկրորդ հորիզոնականում, ինչպես և 2009 թ. էր, ԱԺ պատգամավոր Սամվել Ալեքսանյանին պատկանող «Ալեքս Գրիգն է»: Երրորդ տեղում «ԱրմենՏելն» է, իսկ չորրորդում` «Ղ. Տելեկոմը»:
Նշենք, որ, ընդհանուր առմամբ, ցուցակի առաջին 15-յակը, բացառությամբ «Ավերս» ընկերության, չի փոխվել, այսինքն` ինչպես 2009 թ., այնպես էլ 2010 թ., նույն 15 ընկերություններն են գլխավորել հարկատուների ցուցակը` որոշ դիրքային փոփոխություններով:
1000 խոշոր հարկատուների ցուցակից բացի` ՊԵԿ-ը հրապարակեց նաև 2010թ. ընթացքում սոցիալական ապահովագրության վճար վճարած 1000 ամենախոշոր ընկերությունների և 100 և ավելի աշխատողների միջին ցուցակային թիվ հայտարարագրած ապահովադիր հանդիսացող առևտրային կազմակերպությունների ցանկերը: Վերջինից երևում է, որ Հայաստանում կան 419 տնտեսվարող սուբյեկտներ, որոնք ունեն 100 և ավելի աշխատակիցներ:
Ընդ որում` Հայաստանում ամենաշատ աշխատակիցներ ունի «Հայաստանի էլեկտրական ցանցերը» ` 7,602 հոգի: Երկրորդ տեղում «Հայռուսագազարդն» է`5,993 հոգի: Երրորդ տեղում «Հարավկովկասյան երկաթուղիներն» են` 4,332 աշխատակից, չորրորդում` «ԱրմենՏելն» է` 3,210 աշխատակից, իսկ հինգերորդում` «Զանգեզուրի պղնձամոլիբդենային կոմբինատը»` 3,138 աշխատակից:
Մյուս հիշարժան իրադարձությունը ՀՀ տարածքային կառավարման նախարարի տեղակալ Վաչե Տերտերյանի ասուլիսն էր: Վերջինս հայտարարեց, որ խոշոր հողատերերի տեսակարար կշիռը տեղական հարկերի չվճարման մեջ բավականին մեծ է: «Դուք գիտեք, որ համայնքները իրավասու են հետամուտ լինել իրենց` օրենքով ամրագրված հարկերի հավաքագրմանը: Այս առումով շատ դեպքերում մենք ունենք անպարտաճանաչ հարկատուներ, և այդ անպարտաճանաչ հարկատուների մեջ, ցավոք, կան նաև հարկատուներ, որոնք ունեն մեծ գույք, մեծ հողատարածքներ և հատկապես նրանց չվճարումներն են, որ անդրադառնում են համայնքների հողի հարկի և գույքահարկի հավաքագրման ու հատկապես վարչարարության վրա»,- նշեց Վ. Տերտերյանը:
Ըստ նրա` նախկինում համայնքապետերը ինչ-ինչ պատճառներով խուսափում էին խոշոր հողատերերին դատի տալ տեղական հարկերը չվճարելու համար: «Բայց մենք նախորդ տարի հարկերի մասին օրենքում արեցինք փոփոխություն, որը վերաբերում էր և՛ տեղական հարկերին, և՛ տեղական հարկերի վարչարարությանը: Ըստ այդմ` մենք ներդրել ենք մի նորմ, որի համաձայն խոշոր չվճարումների պարագայում համայնքապետերը պարտավոր են դատական հայցերով հանդես գալ»,- ասաց Վ. Տերտերյանը:
Հաջորդ հիշարժան իրադարձությունը կառավարության հինգշաբթի օրվա նիստն էր, որի ժամանակ քննարկվեց Ազգային ժողովի մի խումբ պատգամավորների` օրենսդրական նախաձեռնության կարգով ներկայացրած՝ ՀՀ Մաքսային օրենսգրքում փոփոխություններ և լրացումներ կատարելու օրինագիծը, որով առաջարկվում է մի շարք ապրանքների համար ՀՀ մաքսային սահմանին գանձվող մաքսատուրքի դրույքաչափը ներկայումս գործող 10-ի փոխարեն սահմանել մաքսային արժեքի նկատմամբ 15 տոկոս` նպատակ ունենալով պաշտպանել ներքին արտադրողին։ Կառավարությունը բացասական եզրակացություն տվեց այս նախագծին, որը սահմանված կարգով կներկայացվի ՀՀ Ազգային ժողով:
