Ինչպես հաղորդում է Associated Press գործակալությունը, «Մուսուլման եղբայրներ» իսլամիստական կազմակերպությունը բանակցություններ է սկսել իշխանությունների հետ:
Հիշեցնենք, որ այս կազմակերպությունը տասնամյակներ շարունակ արգելված է եղել Եգիպտոսում, իսկ նրա ներկայացուցիչները մշտապես ենթարկվել են բռնաճնշումների: Կազմակերպությանն արգելված է եղել մասնակցել երկրի քաղաքական կյանքին, թեկնածուներ առաջադրել համապետական ընտրություններին: Սովորաբար նրանց ներկայացուցիչներն ընտրություններին մասնակցել են որպես անկախ պատգամավորներ, կամ ընդգրկվել այլ քաղաքական ուժերի համամասնական ցուցակներում:
«Մուսուլման եղբայրները» վերջին զարգացումների սկսզբից ևեթ ակտիվ չընդգրկվեցին պայքարի մեջ, որտեղ առաջնորդի դրոշը պատկանում էր մի շարք երիտասարդական կազմակերպություններին: Քանի որ այս շարժումն իր բնույթով իսլամիստական չէր, իսկ կարգախոսներն ավելի շատ ժողովրդավարական բնույթի էին, ապա «Մուսուլման եղբայրները» մտահոգված էին, որ քաղաքական զարգացումների նման ընթացքի և շարժման առաջնորդնողների հաջողության դեպքում, իրենք կարող են կորցնել բնակչության աջակցությունը, այդ պատճառով իրենց ձեռնտու էր ժողովրդավարական ուժերի տապալումը: Սակայն երբ նրանք տեսան, որ շարժումը լայն թափ է առնում, անմիջապես հայտարարեցին իրենց մասնակցության մասին` քաղաքական գործըթնացներից վերջնականապես դուրս չմնալու համար:
Օրեր շարունակ նրանք, ինչպես նաև այս շարժման մեջ ընդգրկված ազդեցիկ ուժերի մեծամասնությունը, մերժում էին իշխանությունների հետ որևէ համագործակցության հնարավորություն, քանի դեռ Եգիպտոսի նախագահ Հոսնի Մուբարաքը հրաժարական չէր տվել երկրի ղեկավարի պաշտոնից: Սակայն երեկ «Մուսուլման եղբայրների» ղեկավարությունը խախտեց այս խոստումը: Ըստ նրանց ներկայացուցչի` այս քայլով իրենք փորձում են պարզել, թե «որքանով են իշխանությունները պատրաստ կատարել ժողովրդի պահանջները»: Բանակցությունները սկսվել են երեկ առավոտյան` այդ կազմակերպության ներկայացուցիչների և փոխանախագահ Օմար Սուլեյմանի մասնակցությամբ: Այս լուրը հաստատում են նաև արաբական աղբյուրները:
Անշուշտ, «Մուսուլման եղբայրները» որոշակի դերակատարություն ունեն երկրի քաղաքական կյանքում, և նրանց այս քայլը կարող է բարդություններ ստեղծել երկրում սկիզբ առած ժողովրդավարական գործըթնացների համար: Ակնհայտ է նաև, որ այս քայլով իշխանություններն էլ ձեռք են բերում լեգիտիմություն, քանի որ ընդդիմության ազդեցիկ ուժերից մեկն իրենց կոչով բանակցություններ է սկսել` երկրի քաղաքական ապագան որոշելու համար: