Դոհայի՝ կանանց աշխարհի ոչ պաշտոնական առաջնությունում հոկտեմբերի 26-ին կայացան առաջին հանդիպումները: Առաջինը խաղահրապարակ դուրս եկան ռուսաստանցի Վերա Զվոնարյովան եւ Սերբիայի ներկայացուցիչ Ելենա Յանկովիչը, ով ժամանակին գլխավորում էր WTA-ի վարկանիշային աղյուսակը, սակայն Յանկովիչը չկարողացավ լուրջ դիմադրություն ցուցադրել, եւ Վերային հաջողվեց հեշտությամբ հաղթանակ տոնել 6-3. 6-0 հաշվով: Հաջորդը կորտ դուրս եկան աշխարհի առաջին թենիսիստուհի Կարոլինա Վազնակին եւ Ռուսաստանի մյուս ներկայացուցիչ Ելենա Դեմյենտեւան, սակայն այս խաղում էլ լուրջ պայքար չգրանցվեց, եւ Կարոլինան 56 րոպեի ընթացքում հասավ հաղթանակի` 6-1, 6-1 հաշվով: Կարոլինան հաջորդ հանդիպման հաղթանակի դեպքում տարին կավարտի առաջին հորիզոնականում: Օրվա վերջին մրցավեճում հանդիպեցին «Ռոլան Գարոս»-ի եզրափակչի մասնակիցները` ավստրալացի Սամանտա Ստոսերը եւ Իտալիայի ներկայացուցիչ Ֆրանչեսկա Սկիավոնեն: Սակայն Դոհայում Սամանտան կարողացավ հաղթանակ տոնել 6-4, 6-4 հաշվով: