Ռուսաստանի մայրաքաղաք Մոսկվայում ընթացող Moscow Open միջազգային շախմատային փառատոնի նախավերջին տուրում Գրոսմայստեր Լիլիթ Գալոյանը կրկին պարտություն կրեց, այս անգամ նա սև ֆիգուրներով զիջեց Վալենտինա Գունինային: «Առաջին Լրատվական»-ի հետ հեռախոսազրույցում Լիլիթն ասաց, որ մրսածության պատճառով արդեն հինգերորդ օրն է, որ ինքը բարձր ջերմությամբ է մոտենում խաղատախտակին:
Ռուսաստանը ներկայացնող հայազգի Կարինա Համբարձումովան հերթական պարտությունը կրեց: Այս տուրում նրա մրցակիցը Մարիյա Ֆոմինիխն էր:
Մրցաշարային աղյուսակը գլխավորող Մոնղոլիայի ներկայացուցիչ Մոնգունթուլ Բութայագը ոչ-ոքի խաղաց Օլգա Գիրիայի հետ և թույլ տվեց աշխարհի նախկին չեմպիոնուհի Ալեքսանդրա Կոստենյուկին միավորներով հավասարվել իրեն, վերջինս սպիտակ ֆիգուրներով պարտության մատնեց Յոլանտա Զավադսկային և այժմ ունի 6.5 միավոր:
Երրորդ տեղում, վաստակած 5 միավորով, Չինաստանի ներկայացուցիչ Չզաո Սյուեն է, ով այս տուրում պարտություն կրեց Ալինա Կաշլինսկայայից:
Այսօր` վերջին տուրում Լիլիթ Գալոյանը կմրցի Չզաո Սյուեի հետ, Կարինա Համբարձումովան` Օլգա Գիրիայի, իսկ չեմպիոնության համար որոշիչ կլինի Մոնգունթուլ Բութայագ-Ալեքսանդրա Կոստենյուկ պարտիան: