ԿԲ հրապարակած 2011թ.առաջին եռամսյակի դրամավարկային քաղաքականության ծրագրի համաձայն`համաշխարհային և ներքին տնտեսությունների ակնկալվող նոր զարգացումները հաշվի առնելով՝ 2011թ. մի շարք մակրոտնտեսական ցուցանիշների կանխատեսումները ԿԲ-ն վերանայել է:
«Համաշխարհային շուկաներում հիմնական մետաղների գների բարձր մակարդակի պահպանման (դեռևս չորրորդ եռամսյակում վերջիններիս աճը գերազանցեց սպասումները) և արդյունաբերության ակնկալվող աճի բարձր տեմպերի պայմաններում ապրանքների և ծառայությունների դոլարային և իրական աճերը վերանայվել են աճի ուղղությամբ:
Այսպես` 2011թ. ակնկալվում է ապրանքների և ծառայությունների դոլարային արտահանման աճ՝ 13-15% միջակայքում և իրական ծավալների աճ՝ 6-8% միջակայքում»,- նշվում է այդ ծրագրում:
Ապրանքների և ծառայությունների ներմուծման աճի տեմպի ցուցանիշը ևս վերանայվել է աճի ուղղությամբ: Ներմուծման գների ակնկալվող աճի բարձր տեմպերի պահպանման և ներքին տնտեսության դրական զարգացումների ներքո 2011թ. ակնկալվում է ապրանքների և ծառայությունների ներմուծման դոլարային աճ 9-11% միջակայքում և իրական ծավալների փոքր աճ:
