Թուրքական Today’s Zaman թերթին տված հարցազրույցի ժամանակ թուրքական դիվանագիտական աղբյուրը հայտնել է, որ 1915 թվականին Օսմանյան կայսրությունում իրականացված Հայոց ցեղասպանության ճանաչման վերաբերյալ Իսրայելի խորհրդարանում տեղի ունեցած բանավեճերը չեն ազդի տվյալ խնդրի շուրջ Թուրքիայի որդեգրած դիրքորոշման վրա, քանի որ այդ քննարկումները չեն փոխում փաստերը:
«Այսօր այդ հարցում Թուրքիայի դիրքորոշումն այն է, որ 1915 թվականի իրադարձությունները, ինչպեսև յուրաքանչյուր այլ պատմական փաստ, պետք է քննարկվեն պատմաբանների, և ոչ թե խորհրդարանների կողմից: Խորհրդարանների կողմից տվյալ խնդրի առթիվ կայացված որոշումները որևէ օգուտ չեն բերում: Այդպիսի քայլերը չեն նպաստում այդ գործընթացին: Դա վնասում է պատմաբանների աշխատանքին ու երկու երկրներին:
Յուրաքանչյուր երկրի՝ ներառյալ Իսրայելի խորհրդարանի ընդունած և ոչ մի որոշում չի կարող ազդել տվյալ խնդրի շուրջ Թուրքիայի որդեգրած դիրքորոշման վրա: Մեր դիրքորոշումը, մտածելակերպն ու որոշումներն ակնհայտ են: Բացի դրանից՝ Հայաստանի Սահմանադրական դատարանի որոշումը նույնպես հասկանալի է: Այդ որոշումը փաստացիորեն արգելափակել է գործընթացը»,- ասվում է հրապարակման մեջ:
Հիշեցնենք, որ Իսրայելի խորհրդարանում Հայոց ցեղասպանության ճանաչման հարցը քննարկվել է հունիսի 12-ին:
