Առավոտյան ռուսական հայտնի Советский Спорт պարբերականի կայքում զետեղված, ապա հայկական լրատվամիջոցներում արտատպված հարցազրույցը ՀՖՖ նախագահի հետ շոկի մեջ գցեց հայ ֆուտբոլասերին: Ռուբեն Հայրապետյանն ասել էր, որ Հայաստան-Ռուսաստան հանդիպման տոմսերն արդեն վաճառված են:
Շտապենք ուրախացնել մեր հավաքականի երկրպագուներին. «Առաջին Լրատվական»-ին վերջապես հաջողվեց կապ հաստատել ՀՖՖ մամուլի ծառայության հետ, որտեղից մեզ ասացին, որ Советский Спорт-ի լրագրող Արտյոմ Լոկալովը սխալ է հասկացել Ռուբեն Հայրապետյանին և Հայաստան-Ռուսաստան խաղի տոմսերը ոչ միայն սպառված չեն, այլ անգամ դեռ վաճառքի չեն հանվել: Տիգրան Իսրայելյանն ասաց, որ դեռ հայտնի չէ, թե երբ տոմսերը կհանվեն վաճառքի և խոստացավ անպայման նախօրոք տեղյակ պահել այդ մասին:
Նշենք, որ սա ռուս լրագրողի առաջին սխալը չէ: Ընդամենը երկու օր առաջ նա, կոպտորեն խախտելով լրագրողական էթիկայի կանոնները, միանգամայն ոչ համարժեք հետևություններ էր արել «Ժամանակ» օրաթերթի և «Առաջին լրատվականի» գլխավոր խմբագիր Արման Բաբաջանյանի հետ հարցազրույցից:
