Բլոգեր Ալեքսեյ Նավալնին դիմել է Մարդու իրավունքների եվրոպական դատարան (ՄԻԵԴ)` բողոքելով դատարանի այն որոշման դեմ, որն իրեն, ըստ գործարար Վլադլեն Ստեպանովի հայցի, պարտադրում է վճարել 100 հազար ռուբլի: Այս մասին այսօր հայտնել է Interfax գործակալությունը:
Ավելի վաղ Մոսկվայի քաղաքային դատարանը հաստատել էր Լյուբլինսկի շրջանային դատարանի որոշումը, ըստ որի` Նավալնին պետք է վճարի տուգանքը, ինչպես նաև հրապարակի փաստերի հերքում, որոնք հարուցել են գործարարի դժգոհությունը:
Խոսքը Նավալնիի բլոգում հրապարակված հոլովակի մասին է, որը պատմում է Սերգեյ Մագնիտսկու սպանության անկախ հետաքննության մասին: Մասնավորապես, հոլովակում նշվում էր, որ Վլադլեն Ստեպանովը կնոջ հետ միասին մասնակից է 5.4 մլրդ ռուբլու հափշտակությանը, որոնց անհետացման գործը հետաքննում էր իրավաբանը:
Բողոքով դիմելով ստրասբուրգյան դատարան` Նավալնիի փաստաբանները հայտարարել էին, որ ռուսական դատարանները խախտում են արդար դատական հետաքննություն անցկացնելու ու ազատորեն կարծիք արտահայտելու իրավունքը, որն ամրագրված է Մարդու իրավունքների պաշտպանության կոնվենցիայով:
Բողոքի հետ միասին ՄԻԵԴ են ներկայացվել փաստաթղթեր, որոնք, ըստ հայցվորների, հաստատում են հոլովակում առկա տեղեկությունը:
