«ԳԱԼԱ» հեռուստաընկերության աշխատակազմն իր մտահոգությունն է հայտնում «Սիվիլիթաս» հիմնադրամի գործունեության շուրջ տեղի ունեցած վերջին զարգացումների կապակցությամբ:
«Սիվիլիթաս» հիմնադրամն այն կազմակերպություններից է, որի գործունեությունը միտված է ՀՀ-ում բաց հասարակություն և հանրային բարձր գիտակցություն ձևավորելուն: Հաշվի առնելով «ԳԱԼԱ» հեռուստաընկերության նախադեպն ու փորձը, մենք համոզված ենք, որ քրեական գործն ուղղորդված քաղաքական պատվեր է:
Մենք կարծում ենք, որ Հայաստանում ժողովրդավարական ինստիտուտների դեմ պայքարն անօգուտ, անարդյունավետ զբաղմունք է, իսկ այդ պայքարում իրավապահ մարմիններին որպես գործիք օգտագործելու մեթոդն ուղղակի վայել չէ մեր պետությանը:
«ԳԱԼԱ» հեռուստաընկերությանը լավ ծանոթ են «հարկային ստուգումներ», «ապրանքագիտական փորձաքննություն», «հարցաքննություններ» և «այլ քննչական գործողություններ» տերմինները, և մենք համոզված ենք, որ ժամկետանց այս մեթոդներով ազատ,ազնիվ և անկաշկանդ գործունեություն ծավալող որևէ կազմակերպության «պատին սեղմելու» ցանկացած օպերացիա դատապարտված է ձախողման:
Մենք զորակցություն ենք հայտնում «Սիվիլիթաս» հիմնադրամի աշխատակազմին, այդ կազմակերպության յուրաքանչյուր անդամին և հորդորում ենք չվհատվել ու չընկրկել, քանի որ սա ոչ թե մեկի կամ մի կառույցի, այլ քաղաքացիական հասարակության յուրաքանչյուր մասնիկի, անհատի և խմբի պայքարն է, բոլոր այն գիտակից մարդկանց, ովքեր պայքարում են քաղաքական կեղտոտ խարդավանքներով հասարակության վրա ազդեցություն գործելու փորձերի դեմ և անհատական ազատությունների ձեռքբերման համար:
Սա համընդհանուր շահի համար մղվող պայքար է, որի արդյունքում մեկընդմիշտ պետք է վերացվի ուժայինների միջոցով քաղաքական հաշվեհարդար տեսնելու արատավոր պրակտիկան: Մենք հորդորում ենք նաև այս գործով զբաղվող և միաժամանակ մեր ազգի անվտանգությունն ապահովող կառույցի բոլոր ազնիվ աշխատակիցներին` հրաժարվել քաղաքական պատվեր կատարելու տհաճ, անշնորհակալ պարտականությունից:
Անկախության 20 տարիների ընթացքում քաղաքացիական հասարակության ձևավորումը մեր ամենամեծ ձեռքբերումներից է, և մենք պատրաստ ենք հավասարապես պայքարել և կանգնել այդ հասարակության յուրաքանչյուր անդամի կողքին` նրա դեմ ոտնձգությունները բացառելու համար:
