Հայաստանի ֆուտբոլի ֆեդերացիայի (ՀՖՖ) նախագահ Ռուբեն Հայրապետյանը Советский Спорт պարբերականին տված հարցազրույցում ևս մեկ անգամ անդրադարձել է «Ժամանակ» օրաթերթում տպագրված այն հրապարակմանը, որում ասվում էր, որ այդ հանդիպումը կարող է պայմանավորված բնույթ կրել` այն որակելով հիմարություն և ասել է, որ «Եվրո-2012»-ի ընտրական փուլի Հայաստան-Ռուսաստան հանդիպման բոլոր տոմսերն արդեն վաճառված են:
«Դա պարզապես հիմարություն է: Ինչպե՞ս կարելի է նման բան գրել: Սակայն չեմ կարծում, որ այդպիսի հրապարակումներով նրանց կհաջողվի հունից հանել թե՛ մեր, թե՛ ռուս ֆուտբոլիստներին: Նրանք հասկանում են, որ բոլոր այդ կարգի խոսակցությունները փողոցային քննարկումների արդյունք են»:
Խոսե՞լ եք արդյոք ՌՖՄ-ն անդամներից որևէ մեկի հետ վերջին իրադարձությունների վերաբերյալ հարցին նա պատասխանել է. «Ոչ: Որքանով ես եմ տեղյակ, մի քանի օր առաջ ինձ հետ ցանկացել էր խոսել Ռուսաստանի ֆուտբոլի միության նախագահը, սակայն զրույցը դեռ չի կայացել. ես տեղում չէի: Կարծում եմ` շուտով մենք կխոսենք:
Երևանում կայանալիք հանդիպման տոմսերի վերաբերյալ հարցին Հայրապետյանն ասել է.
«Մեզ մոտ բոլոր տոմսերը վաճառված են: Իսկ Ռուսաստանին, ինչպես և նախատեսվում էր, մենք հատկացրել ենք «Հանրապետական» մարզադաշտի նստատեղերի 10%-ը: Մարզադաշտը տեղավորում է մոտ 15 հազար հանդիսականի: «Առաջին Լրատվական»-ը փորձեց ՀՖՖ-ից ճշտել թե ո՞րտեղ ե՞րբ և որքնով են վաճառվել տոմսերը, բայց գրասենյակի հեռախոսները չէին պատասխանում, իսկ մեր ճանաչած բազմաթիվ ֆուտբոլասերներից ոչ ոք անգամ տեղյակ չէր, որ տոմսերի վաճառքը սկսվել է:
Իսկ հարցին, թե ինչու հանդիպումը չի անցկացվում «Հրազդան» մարզադաշտում, Հայրապետյանը պատասխանել է. «Հրազդան»-ի դաշտը շատ վատն է, գազոնը տեղադրված է 1972թ.: Մեր ֆուտբոլիստները չեն ցանկանում այնտեղ խաղալ, կարծում եմ` ձերոնց էլ դուր չի գա: Իսկ «Հանրապետական»-ում նոր գազոն է տեղադրված և մարզադաշտը վերանորոգված է:
ՀՖՖ նախագահը նաև ասել է, որ հատուկ պարգևավճարներ Հայաստան-Ռուսաստան խաղի համար նախատեսված չեն: «Մեր խաղացողները ամեն հաղթական խաղի համար ստանում են պարգևավճարներ: Որքանով ես եմ տեղյակ, այդպիսի պրակտիկա կա բոլոր երկրներում»,- եզրափակել Հայաստանի ֆուտբոլի թիվ մեկ պատասխանատուն:
Լուսանկարը` PanArmenianPhoto-ի