Այսօր հրավիրած մամուլի ասուլիսում սոցիոլոգ Ահարոն Ադիբեկյանը նշեց, որ Հայաստանում կա 915 համայնք, որոնցից 675-ում «Հանրապետական» կուսակցության առաջադրած համայնքի ղեկավարներն են, 72-ը` «Բարգավաճ Հայաստան» կուսակցության: Նրա հաշվարկներով` «Բարգավաճ Հայաստանը» լուրջ ներկայություն ունի ինչպես Կոտայքի մարզում, այնպես էլ` այդ մարզից դուրս:
Ըստ Ահարոն Ադիբեկյանի` համայնքներում մարդիկ վստահում են համայնքի ղեկավարին: Նրա կանխատեսումներով, ապագա խորհրդարանում իրենց տեղը կունենան ՀՀԿ-ն, ԲՀԿ-ն, «Օրինաց երկիրը», Դաշնակցությունը: Ահարոն Ադիբեկյանի հաշվարկներով`խորհրդարան կանցնի նաև Հայ ազգային կոնգրեսը, քանի որ նա համակիր ընտրազանգված ունի Երևանում:
Ինչ վերաբերում է «Ժառանգություն» կուսակցությանը, ապա, ադիբեկյանական հաշվարկներով` Րաֆֆի Հովհաննիսյանի վարկանիշը երբեք չի իջել ութ տոկոսից, և եթե նա կարողանա այդ վարկանիշը պահպանել, ապա «Ժառանգությունը» տեղ կունենա ապագա խորհրդարանում:
Պարզվում է, որ Ադիբեկյանի հաշվարկներով, ընդդիմադիր դաշտում կա ևս մեկ-երկու կուսակցության տեղ, քանի որ կան ընտրողներ, որոնք չեն ընդունում ո՛չ ՀԱԿ-ին, ո՛չ «Ժառանգությանը», ո՛չ Դաշնակցությանը: Ահարոն Ադիբեկյանը նշեց, որ այդ թափուր տեղը կարող են զբաղեցնել կա՛մ Գուրգեն Արսենյանի կուսակցությունը, կա՛մ ՍԻՄ-ը, կա՛մ էլ Տիգրան Կարապետյանը: Ըստ Ադիբեկյանի` այդ կուսակցությունները պետք է ներկայացված լինեն համայնքներում, ունենան լավ թիմ և միջոցներ, ու նրանց ներկայությունը խորհրդարանում ապահովված է:
