Ավստրալիայում այսօր փակվել է 1980 թվականին երեխայի անհետացման գործը: Ինչպես տեղեկացնում է BBC News-ը, հետաքննությունը Ազարիա Չեմբերլենի մահվան մեղավոր է ճանաչել վայրի դինգո շանը:
Քննիչ Էլիզաբեթ Մորիսի տվյալներով՝ 1980 թվականի օգոստոսի 16-ին Չեմբերլենի ընտանիքը (ծնողները և 3 երեխաները) վրան են ամրացրել Այերս Ռոքի ճամբարում: Հաջորդ օրը երեկոյան ընտանիքի մայրը՝ Լինդի Չեմբերլեն-Կրեյտոնը, ընթրիք պատրաստելիս երեխայի լացի ձայն է լսել վրանից:
Կինը սկսել է բղավել, որ շունը երեխային տարել է այնտեղից: Շան հաչոցը լսել են ճամբարում գտնվող մյուս մարդիկ նույնպես: Փոքրիկին մի քանի ժամ շարունակ փնտրել են մոտակայքում: Փրկարարները հայտնաբերել են դինգոյի հետքեր, իսկ հանգստացողներից մեկը լուսանկարել է վրանին մոտեցող շանը՝ դեպքից 20 րոպե առաջ: Ազարիայի մարմինն այդպես էլ չի գտնվել, սակայն վրանում հայտնաբերվել են արյան հետքեր:
Հետաքննությունը դինգոյի մասնակցությամբ վարկածը մտացածին է համարել և 1982 թվականին Լինդիին, որը հղի էր, մեղավոր ճանաչել դստեր մահվան մեջ ու դատապատել ցմահ բանտարկության: Ամուսնուն տվել են պայմանական ժամկետ՝ հանցանքին մասնակից դառնալու համար: Ինչպես նշում է The Australian-ը, 1987 թվականին ամուսիններին արդարացրել են, սակայն երեխայի մահվան պատճառի մասին պաշտոնական եզրակացություն այդպես էլ չի հայտնվել:
Այսօր Լինդիին տրվել է Ազարայի մահվան վկայականը: Հետաքննությունը կատարվածի մեղավոր է ճանաչել դինգոյին՝ ուսումնասիրելով երեխաների վրա առանց պատճառի հարձակման դեպքերը: 1990-2011 թթ. Ավստրալիայի Քուինսլենդ նահանգում գրանցվել է մարդկանց վրա վայրի շների հարձակման 239 դեպք:
Չեմբերլենների ընտանիքի պատմության մոտիվներով 1988 թվականին նկարահանվել է «Ճիչ մթության մեջ» ֆիլմը, որում մոր դերը կատարել է Մերիլ Սթիփը:
