Ռուսական Regnum լրատվական գործակալության փոխանցմամբ՝ 2012 թվականի առաջին 4 ամիսներին Թուրքիա այցելած ռուս զբոսաշրջիկների թիվը կազմել է 317,000 մարդ և նվազել է 10 տոկոսով ՝ համեմատած նախորդ տարվա միևնույն ժամանակահատվածի հետ:
2011 թվականին Ռուսաստանից Թուրքիա է այցելել 3.47 միլիոն զբոսաշրջիկ, ինչը 11.6 տոկոսով ավելի է եղել՝ համեմատած 2010 թվականի հետ: Այս տարի Ռուսաստանից Թուրքիա մեկնող զբոսաշրջիկների թվի նվազումը պայմանավորում են եգիպտական ուղղությամբ պահանջարկի վերականգնմամբ: Նախորդ տարի Եգիպտոսի քաղաքական խնդիրների պատճառով զբոսաշրջիկները նախընտրեցին իրենց հանգիստն անցկացնել այլ երկրներում:
Այս տարվա առաջին 4 ամիսներին Ռուսաստանը Թուրքիա գործուղած զբոսաշրջիկների թվով զբաղեցրել է 5-րդ տեղը, նրան է բաժին ընկել Թուրքիա այցելած ողջ զբոսաշրջիկների 5.6 տոկոսը: Առաջատարը Գերմանիան է՝ 15 տոկոս (869,000 մարդ), ապա գալիս են Բուլղարիան՝ 6.5 տոկոս (368,000 մարդ), Վրաստանն ու Իրանը՝ մոտ 6-ական տոկոս (349,000-ական մարդ):
Այնուամենայնիվ, Թուրքիան պլանավորել է այս տարի Ռուսաստանից ընդունել մոտ 4 միլիոն զբոսաշրջիկ, իսկ 2015 թվականին այդ ցուցանիշը հասցնել 5 միլիոնի:
