Այսօր հանրապետությունում մեկնարկեցին «Մաթեմատիկա» առարկայի միասնական քննությունները: Քննություններին մասնակցելու դիմում-հայտ է ներկայացրել 8957 դիմորդ: Երևանի պետական համալսարանի ֆիզկուլտուրայի ամբիոնում պետք է քննություն հանձնի 359 դիմորդ: Ինչպես «Առաջին լրատվական»-ի հետ զրույցում տեղեկացրեց ԳԹԿ մամլո խոսնակ Գայանե Մանուկյանն, այս պահի դրությամբ՝ քննության դեռևս չի ներկայացել շուրջ 21 դիմորդ: Ըստ նրա` այսօր, ինչպես նախորդ քննությունների օրերին, գործելու են խլացուցիչները և թույլ չեն տրվելու օգտագործել ավելորդ իրեր, դրանք հավաքվելու են առանձին սեղանի վրա: «Միայն այս քննությանը դիմորդներին թույլ է տրվել օգտագործել պարզագույն հաշվիչներ»,- նշեց Գայանե Մանուկյանը` հույս հայտնելով, որ այսօր ևս, ինչպես այլ առարկաների քննությունների օրերին, քննությունը կանցնի առանց միջադեպերի, սահուն:
«Առաջին լրատվական»-ը զրուցեց ԵՊՀ քննակետրոնում քննություն հանձնող դիմորդ Լուսինե Քեթցյանի հետ, որն ասաց, որ «հայոց լեզու և հայ գրականություն» առարկայից ստացել է 19 բալ, գոհ է իր ստացած միավորից: «Մաթեմատիկա» առարկայի համար ևս պատրաստվել եմ, հույս ունեմ, որ դրական միավոր կստանամ այս քննությունից ևս»,- ասաց Լուսինե Քեթցյանը:
Քիչ առաջ ԵՊՀ քննակենտրոնի երկու քննասենյակներում թեսթերի հանդիսավոր բացման արարողությունից և թեսերի հանձնումից հետո մեկնարկեցին քննությունները:
Հիշեցնենք, որ բուհական ընդունելության միասնական քննությունները մեկնարկել են հունիսի 1-ից: Հունիսի 1-ին անցկացվել են «Կենսաբանություն», «Աշխարհագրություն», «Ընդհանուր պատմություն», իսկ հունիսի 5-ին` «Հայոց լեզու և հայ գրականություն» առարկայի միասնական քննությունները:
