ՀՀ Սփյուռքի նախարար Հրանուշ Հակոբյանը օրեր առաջ Կալիֆոռնիայում ամերիկահայ համայնքի հետ հանդիպման ժամանակ ներկայացրել է Սահմանադրության փոփոխությամբ խորհրդարանը երկպալատանի դարձնելու Սերժ Սարգսյանի մտադրությունը: Հրանուշ Հակոբյանը բարձրաձայնել է սփյուռքահայի ձայնը, խոսքը պետական կառավարման համակարգում, քաղաքականության մշակման եւ պետական իշխանության գործում լսելի դարձնելու իրենց իղձերի մասին:
«Վերին պալատը դա սենատն է, որտեղ պետք է ընդգրկվեն նաեւ սփյուռքահայեր»,- ասել է Հրանուշ Հակոբյանը: «Առաջին լրատվական»-ը Հայաստանի գրողների միության անդամ, քուրդ լրագրող, «Զագրոս» թերթի գլխավոր խմբագիր Ալիխանե Մամեից (Մուսոյան) հետաքրքրվեց, թե ինչպես է վերաբերվում այն փաստին, որ ՀՀ քաղաքացի ազգային փոքրամասնություններն այսօրվա խորհրդարանում ներկայացված չեն, իսկ արտերկրում ապրող սփյուռքահայերին ՀՀ իշխանություններն ուզում են ընդգրկել պետական կառավարման համակարգում:
«Ժամանակին, երբ Հայաստանը նոր էր անկախացել, ես Գերագույն խորհրդում աշխատել եմ որպես Մարդու իրավունքների եւ ազգային հարցերի մշտական հանձնաժողովի փորձագետ: Հանձնաժողովի նախագահը երջանկահիշատակ Ռաֆայել Պապայանն էր: Այն ժամանակ, երբ մենք աշխատում էինք օրենքների վրա, ազգային փոքրամասնություններին վերաբերող հարցը եղել է ԳԽ-ի ուշադրության կենտրոնում:
Մենք առաջարկել էինք, որ «Ընտրական օրենսգրքում» լինեն կետեր, դրույթներ, որոնք կապահովեն ազգային փոքրամասնությունների մասնակցությունն Ազգային ժողովի աշխատանքներում: Սակայն այն ժամանակ նախատեսեցին, որ ազգային փոքրամասնություններին պետք է տեղ տան կուսակցությունների միջոցով: Այդ առաջարկությունը, սակայն, կյանքի չկոչվեց»,- մեր զրույցի ժամանակ նշեց Ալիխանե Մամեն:
Նա բերեց Իրաքյան Քուրդիստանի օրինակը, որտեղ երկու հազար հայեր, որպես ազգային փոքրամասնություն, ունեցան իրենց ներկայացուցիչը օրենսդիր մարմնում:
Մամեն կարծում է, որ կա անհրաժեշտություն, որ Հայաստանում էլ ազգային փոքրամասնությունները ներկայացված լինեն խորհրդարանում: Եվ դա, ըստ մեր զրուցակցի, ավելի ցանկալի տարբերակ է, քան սփյուռքահայերի մասնակցությունը:
Ժամանակին Ալիխանե Մամեն, իր ասելով, դեմ է եղել երկքաղաքացիությանը, քանի որ դրա մեջ վտանգ է տեսել:
«Այդ այլ երկրների քաղաքացիները, թեկուզ հայ լինեն, կարող էին ուղարկված լինել տարբեր կազմակերպությունների կողմից»,- իր նախկին մտավախությունն այսպես է բացատրում մեր զրուցակիցը:
Հիմա, ըստ մեր զրուցակցի, մենք ավելի փորձառու ենք դարձել որպես պետություն, եւ վտանգի հավանականությունը նվազել է, քանի որ կարող ենք պարզել, թե ով ով է:
«Ժամանակին դեմ էի երկքաղաքացիությանը, հիմա ձեռնպահ եմ, կանցնի որոշ ժամանակ` կողմ կլինեմ»,- ասաց Ալիխանե Մամեն:
