Այսօր լրագրողների հետ հանդիպման ժամանակ Տարածաշրջանային հետազոտությունների կենտրոնի տնօրեն Ռիչարդ Կիրակոսյանը խոսեց «Ի՞նչ կփոխի Քլինթոնի այցը հայ-թուրքական փոխհարաբերություններում» թեմայի շուրջ:
Նրա դիտարկումներով՝ Քլինթոնի տարածաշրջանային այցը Հայաստան խանգարվեց ադրբեջանական հարձակումների պատճառով: Հատկանշական է նաև Քլինթոնի այցը Թուրքիա: Ըստ նրա՝ թուրք-ամերիկյան հարաբերություններում տեսնում ենք նոր հարթակ և նոր մակարդակ. դրանք խիստ լարված են:
«Մենք տեսնում ենք երկու բարելավումներ՝ կապված Սիրիայի և Իրանի հետ: Թուրքիան ակտիվորեն սպառազինում է Սիրիայի ապստամբներին, ապահովում ռազմամթերքով, իսկ Ռուսաստանը զինամթերքով է ապահովում Ասադի կառավարությանը, ինչը նշանակում է, որ Թուրքիայի և Ռուսաստանի շահերը կարող են բախվել: Ռուս-թուրքական հարաբերությունները դեռևս լարված են և օրհասական, որն ուղղակիորեն ազդում է թուրք-ամերիկյան հարաբերությունների վրա:
Տեսնում ենք, որ Իսրայելի կառավարությունը Ցեղասպանության վերաբերյալ պատրաստվում է ընդունել բանաձև, որը Թուրքիայից վրեժ լուծելու գործիք կլինի՝ պայմանավորված այն հանգամանքով, որ Իսրայելը զինում է Ադրբեջանին»,- վերլուծեց քաղաքագետը՝ հավելելով, որ ԱՄՆ կառավարության և Քլինթոնի տեսակետը հայ-թուրքական հարաբերությունների վերաբերյալ նույնն է. ԱՄՆ կառավարության և Քլինթոնի ուղերձը հստակ էր՝ սպասումները Թուրքիայի կողմից են:
Շարունակելով վերլուծել՝ Ռիչարդ Կիրակոսյանն ասաց, որ Քլինթոնը անցյալ հինգշաբթի այցելելով Թուրքիա՝ մասնակցեց Համաշխարհային հակաահաբեկչական ֆորումին, որը Թուրքիան օգտագործեց՝ բարելավելու համար իր դիրքը տարածաշրջանում: Սակայն Թուրքիայում տեղի էր ունենում ավելի կարևոր իրադարձություն՝ թուրքական կառավարության կողմից նոր թուրքական սփյուռքի կազմավորումը:
Ըստ նրա՝ կառավարությունը փորձում է միավորել 6,5 մլն թուրքական սփյուռքը: «Այս փորձն ուղղված է հայկական սփյուռքի դեմ: Դա նշանակում է, որ ՀՀ սփյուռքի նախարարությունը պետք է ուշադիր լինի:
Թուրքիայում միջոցառմանը, որը համընկավ Քլինթոնի այցի հետ, մասնակցում էին շուրջ 500 խմբեր՝ սփյուռքից ժամանած: Նաև կարևոր է, որ հինգ նախարարներ և երկու փոխնախարարներ էին ներգրավված միջոցառման մեջ»,- մեկնաբանեց բանախոսը՝ հավելելով, որ սփյուռքի նախարարությունը պետք է քայլեր ձեռնարկի Թուրքիայի և Ադրբեջանի կողմից հայկական սփյուռքի դեմ ուղղված գործողություններին, ուշադիր պետք է լինի նաև Ազգային անվտանգության խորհուրդը:
