Ինչպես գիտենք, Երևանի նորանշանակ քաղաքապետ Կարեն Կարապետյանը կադրային փոփոխություններից զատ, որոշել է քաղաքապետարանի աշխատակիցների համար ռուսաց լեզվի դասընթացներ կազմակերպել, ինչը շատերի բնորոշմամբ` ռուսաֆիկացման տիպիկ ծրագիր է:
Քաղաքապետի մամլո խոսնակ Շուշան Սարդարյանից հետաքրքրվեցինք` սկսվե՞լ են, արդյոք, դասընթացները և քանի՞ հոգի են ընդգրկված պարապմունքներում: Նրա խոսքերով, դասընթացներին քաղաքապետարանի աշխատակիցներից շատերն են ցանկություն հայտնել մասնակցել:
Շուշան Սարդարյանը նախ փաստեց, որ շրջանառվող այն լուրերը, որ իբր միայն ռուսաց լեզվի դասընթացներ են լինելու, չեն համապատասխանում իրականությանը, որ բացի ռուսերենից, նաև անգլերեն և ֆրանսերեն են լինելու. ավելին`անգլերեն լեզվի պարապմունքներին մասնակցել ցանկացողների թիվն ավելի շատ է: Շուշան Սարդարյանը նշեց, որ առհասարակ պարապմունքներն իրականացվում են կամավորության սկզբունքով, նպատակն է` կատարելագործել աշխատակիցների` օտար լեզուների իմացությունը:
Ընդ որում` այս ամենը, պարզվում է, քաղաքապետարանի աշխատակիցների առաջարկությամբ է իրականացվել. «Նորից եմ կրկնում` քաղաքապետարանի դասընթացների կազմակերպման նախաձեռնությունը եղել է քաղաքապետարանի ստորաբաժանումների աշխատակիցների առաջարկությամբ»,- ասաց Շուշան Սարդարյանը` ավելացնելով, որ անգլերեն լեզվի խմբում ընդգրկված են 34, ռուսաց լեզվի խմբում` 20, ֆրանսերենի` 16 հոգի:
Հարցին`ստացվում է, որ քաղաքապետարանի աշխատակիցները հանկարծ զգացին, որ լեզուներ իմանալու խնդիր գոյություն ունի և հայտնեցին քաղաքապետին, պատասխանեց, որ քաղաքապետարանի աշխատակիցները փորձի փոխանակման կամ աշխատանքային այլ միջավայրերում ազատ հաղորդակցվելու, սերտ շփումների մեջ են գործընկեր քաղաքների հետ կամ համագործակցում են միջազգային տարբեր կառույցների հետ, իսկ այս դեպքում քաղաքապետարանի աշխատակիցների լեզուների իմացության բարձր մակարդակը կարող է միայն նպաստել այդ շփումներին, և որ սա անժխտելի փաստ է:
«Ավելացնեմ, որ եթե անհրաժեշտություն լինի, քաղաքապետարանը դասընթացներ և դասախոսությունների շարք կկազմակերպի նաև այլ ուղղություներով»,- նկատեց Շուշան Սարդարյանը:
Անդրադառնալով դասընթացներին` մամլո խոսնակը նշեց, որ ֆրանսերենի և ռուսերենի դասընթացները կազմակեպվել են գրանտային կազմակերպությունների հաշվին, իսկ անգլերենը`քաղաքապետարանի:
Հիշեցնենք, որ քաղաքապետարանի աշխատակիցների ընդանուր թիվը մոտ 350-ի է հասնում, բայց քանի որ խմբերը դրամաշնորհային ծրագրի հաշվին են պարապելու, առայժմ կարողացել են այսքանն ընդգրկվել, թեև, ինչպես նշում է Շուշան Սարդարյանը, շատերն են դիմել, հատկապես անգլերենի պարագայում դիմողները շատ են եղել, և հիմա տարբերակ է մշակվում մի քիչ ավելի ուժեղների խումբ ստեղծելու համար:
Ի դեպ, ռուսաց լեզվի դասախոսներ է տրամադրել «Ռոսսոտրուդնիչեստվո»-ի ներկայացուցչությունը, իսկ ֆրանսերեն լեզվի`«Ալյանս Ֆրանսեզ» փակ բաժնետիրական ընկերությունը: