Հայաստան-ԱՄՆ հարաբերությունների վերելքի մասին խոսելն ավելորդ է: Այսօր «Առաջին լրատվական»-ի հետ զրույցում այս մասին ասաց քաղաքագետ Երվանդ Բոզոյանն՝ անդրադառնալով Հայաստանում ԱՄՆ դեսպան Ջոն Հեֆերնի եզրակացությանը, թե Հայաստան ԱՄՆ գործընկերությունը խարսխված է արժեքների վրա:
Քաղաքագետն այս ձևակերպումը «ստանդարտ» անվանեց, որը ոչինչ չասող է: Ըստ նրա՝ այստեղ Ջոն Հեֆերնը նկատի է ունեցել միայն այն, որ պարզապես ԱՄՆ բավարարված է ՀՀ–ի հետ հարաբերություններով: «Իսկ, ըստ էության, ԱՄՆ–ն ունի չափանիշ, որը Վրաստանն է, վերջինիս հետ ԱՄՆ–ն ունի հատուկ հարաբերություններ: ԱՄՆ-ը նաև հայտարարել է, որ ունի ռազմավարական շահեր այս տարածաշրջանում, և հատկապես Ադրբեջանը շատ կարևոր երկիր է իր համար: Բոլորս նաև հասկանում ենք, որ քանի դեռ Հայաստանը ՀԱՊԿ անդամ է, ԱՄՆ-ը չի կարող խորը հարաբերություններ ունենալ Հայաստանի հետ, ինչպիսին, որ Վրաստանի հետ են դրանք»,- մեկնաբանեց քաղաքագետը՝ հավելելով, որ ԱՄՆ-ը բավարարված է այն քաղաքականությամբ, որն ունի Հայաստանը՝ կոմպլեմենտար քաղաքականությամբ՝ բարիդրացիական հարաբերություններ թե՛ Ռուսաստանի, թե՛ Եվրոպական երկրների հետ, ուստի, նրա համոզմամբ, այն ստանդարտ ձևակերպումները, որոնք կան վերջին քսան տարիների ընթացքում, չեն փոխվել, միգուցե կարող են շեշտադրումները փոխված լինել:
Ըստ Երվանդ Բոզոյանի՝ տարիների ընթացքում շեշտադրումների փոփոխության մասին կարելի է խոսել, այլ ոչ թե քաղաքականության, որովհետև ԱՄՆ-ը Հայաստանի անկախացումից հետո գրեթե նույն քաղաքականությունն է վարել, և սկզբնական փուլում քանի դեռ հայկական սփյուռքի գործոնը բավական մեծ էր, Հայաստանի կողմից արգելափակվել էր նաև զենքի վաճառքն Ադրբեջանին: «Սակայն այսօր մենք այդ խնդիրն ունենք, այս իմաստով մինուս ենք ունեցել, որն անխուսափելի էր: Այստեղ նաև սխալ է ասել, որ Հայաստան–ԱՄՆ հարաբերություններն այնպիսին են, որ կարող են Ռուսաստանին խանդի առիթ տալ, ես ավելին կարող եմ ասել, որ հարաբերություններն ավելի պասիվ են, քան նախկինում»,- պարզաբանեց քաղաքագետ Երվանդ Բոզոյանը: