Աշխարհահռչակ System of a Down ռոք խմբի մենակատար հայազգի Սերժ Թանկյանն այսօր ամուսնացել է ծնունդով վանաձորցի Անժելա Մադաթյանի հետ:
Մեր տեղեկություններով հարսանեկան արարողության համար Թանկյանը ագարակ է վարձել Լոս Անջելեսից 10 մղոն հեռավորության վրա Մալիբու կոչվող առափնյա բնակայրում: Հարսանեկան արարողությունը եղել է փակ: Ներկա սափմանափակ հյուրերին չի թույլատրվել տեսագրել ու լուսանկարել:
Հարսանիքին հրավիրված են եղել ջազ-երաժիշտ Արտո Թունջբոյաջյանը, թավջութակահար Արտյոմ Մանուկյանը և ստեղնահար Վարդան Հովսեփյանը:
Սերժ Թանկյանը ծնվել է 1967թ. օգոստոսի 21-ին Լիբանանի Բեյրութ քաղաքում: Նա աշխարհահռչակ System of A Down ալտերնատիվ մետալ-ռոք խմբի և Axis of Justice («Արդարության առանցք») հասարակական կազմակերպության հիմնադիրն է։
Ճանաչվել է, որպես աշխարհի 26-րդ լավագույն մետալ վոկալիստ։ Որպես մենակատար, SOAD-ի գործունեության ընդմիջման ժամանակ ձայնագրել է «Elect The Dead» և «Imperfect Harmonies» ալբոմը։ 2010 թվականի նոյեմբերին հայտարարվեց System of a Down խմբի վերամիավորման մասին:
Սերժ Թանկյանը Լոս Անջելոսում հաճախել է հայկական Rose and Alex Pilibos դպրոցը, հետագայում ուսումը շարունակել է մարկետինգի բնագավառում: 90-ական թվականների սկզբին հանդիպում է Դարոն Մալակյանի հետ, որի հետ էլ որոշում են նոր ռոք խումբ ստեղծել: Սերժն ունի իր սեփական ձայնագրման ստուդիան, որը կոչվում է Serjical Strike:
Թանկյանը հանդես է գալիս անարդարությունն ու դաժանությունը դատապարտող բազմաթիվ ելույթներով: Նա համագործակցելով Տոմ Մորելլոյի հետ` ստեղծել է Axis Of Justice կազմակերպությունը, որի նպատակն է աջակցել երիտասարդներին պաշտպանելու իրենց իրավունքները քաղաքականության ոլորտում: Նրանք կազմակերպել են բազմաթիվ բարեգործական արշավներ: Նրանք նաև մեծ ջանքեր են գործադրում, որպեսզի ստիպեն Միացյալ Նահանգներին և Թուրքիային ճանաչել Հայոց Ցեղասպանությունը:
