Բախումներն ու անկայունությունը Եգիպտոսի տնտեսության վրա շատ թանկ կարող են նստել: Credit Agricole ֆրանսիական բանկի մասնագետների հաշվարկներով, երկրի օրական կորուստները կազմում են շուրջ 310 մլն եվրո:
Հաշվի առնելով ստեղծված իրավիճակը և ձգձգվող քաղաքական ճգնաժամը` բանկի մասնագետները իջեցրել են Եգիպտոսի տնտեսական աճի կանխատեսվող մակարդակը` 1.6 տոկոսային կետով` 5.3%-ից դարձնելով 3.7%, հաղորդում է Associated Press-ը:
Սրա պատճառը բանկերի, ֆոնդային բորսաների ու գործարանների մեծ մասի գործունեության դադարեցումն է, ինչպես նաև մի քանի տասնյակ հազար օտարերկրացիների էվակուացիան երկրից, ինչը լուրջ հարված է հասցրել Եգիպտոսի տնտեսության կարևորագույն ճյուղերից մեկին` զբոսաշրջությանը:
Բացի այդ, տուժում են նաև արաբական այլ երկրների բորսաները: Այն սպասումներից, որ հեղափոխական տրամադրությունները կարող են տարածվել նաև այդ երկրներում, Պարսից ծոցի երկրների առևտրային բորսաների ինդեքսները փակվում են առնվազն 3% նվազմամբ: