Հայաստանի՝ ՀԱՊԿ-ին անդամակցելը երկրի սահմանների անվտանգությանը որևէ բան չի տվել. այդ կառույցին անդամությունը ձեռնտու է միայն իշխանություններին: «Առաջին լրատվական»-ի հետ զրույցում ասաց մարտիմեկյան իրադարձությունների ուսումնասիրման նախկին Փաստահավաք խմբի անդամ Անդրանիկ Քոչարյանը:
«Բնականաբար, ՀԱՊԿ-ն ինչ-որ բան տալիս է, բայց տալիս է միայն հայաստանյան իշխանություններին: Եթե իշխանությունները համաձայնել են Հայաստանն այդ կառույցի անդամ դարձնել, նշանակում է՝ դա իրենց ինչ-որ բան տալիս է: Եթե հիշելու լինենք՝ ինչպես ՀԱՊԿ-ը ոչ վաղ անցյալում արձագանքեց ղրղզական դեպքերին, ապա միանգամից կհասկացվի՝ երբ կարող է այն պետք գալ հայաստանյան իշխանություններին: Բայց սահմանների անվտանգության ապահովմանն այս պահի դրությամբ ՀԱՊԿ-ը ոչինչ չի տվել:
Ավելին` ադրբեջանական դիվերսիոն վերջին գործողությունների առիթով այդ կառույցն ամենավերջիններից մեկն արձագանքեց: Սա վկայում է այն մասին, որ ՀԱՊԿ-ն ինքն էլ չգիտի՝ նման իրավիճակներում ինքն ի՞նչ դերակատարում պետք է ունենա: Այնպես որ, նրա անդամ երկիր լինելու արդյունավետության մասին խոսելն ընդհանրապես ավելորդ է»,- ասաց Անդրանիկ Քոչարյանը: