Newsru.com-ը գրում է, որ ԱՄՆ Սենատի 4 հանրապետական անդամներ նամակով դիմել են նախագահ Բարաք Օբամային` առաջարկելով նրան Թուրքիայի փոխարեն հակահրթիռային համակարգեր տեղակայել Վրաստանում: Նամակում սենատորները նշում են, որ Միացյալ Նահանգները իր ամենաարդյունավետ հակահրթիռային համակարգերը պետք է տեղակայի իր դաշնակիցների հետ միասին, որը ԱՄՆ անվտանգությունն ապահովելու նպատակ ունի:
Մի քանի օր առաջ Թուրքիայի կառավարությունը հայտարարել էր, որ կհամաձայնի իր տարածքում ամերիկյան համակարգեր տեղակայել միայն այն դեպքում, եթե Վաշինգտոնը այդ համակարգերի ռադիոլոկացիոն ռադարների հավաքագրած տեղեկությունները չտրամադրի Իսրայելին: Բացի այդ, թուրքական իշխանությունները հավակնում են լիովին վերահսկել տեղակայվելիք հակահրթիռային համակարգը:
Սակայն փորձագետների կարծիքով, նախագահին ուղղված սենատորների նամակն իմաստազուրկ է, քանի որ անհնար է, որ ԱՄՆ վարչակազմը իր ռազմական համակարգը ՆԱՏՕ-ի անդամ երկրում տեղակայելու փոխարեն տեղակայի Վրաստանում, որը, ՆԱՏՕ-ի անդամ չէ և ակնհայտ լարված հարաբերություններ ունի Ռուսաստանի հետ:
ԱՄՆ-ը Թուրքիայում կամ Բուլղարիայում հակահրթիռային վահան ստեղծելու իր նպատակի մասին հայտարարել է անցած տարվա ամռանը: Տարբերակներից մեկը Սև ծովում զենիթահրթիռային համակարգերով հագեցած նավեր տեղակայելն էր: Տեղեկություն կար նույնիսկ, որ տարածաշրջանային այս համակարգը հնարավոր է տեղակայվեր արդեն այս տարի: