ԱԺ նախկին պատգամավոր, Մարդու իրավունքների առաջին պաշտպան Լարիսա Ալավերդյանն առավել քան համոզված է, որ մոտակա մեկ տարում Ադրբեջանը լայնածավալ պատերազմ չի սկսի: Նման տեսակետ նա հայտնեց «Առաջին լրատվական»-ի հետ զրույցում:
«Հավանականության տեսության մեջ, անշուշտ, ամեն ինչ հնարավոր է, սակայն ես բացառում եմ, որ ադրբեջանական կողմի վերջին օրերի գործողությունները մեծ պատերազմի նախերգանք լինեն: Կան քաղաքագետներ ու վերլուծաբաններ, ովքեր հակված չեն Ադրբեջանի դիվերսիոն գործողությունները կապել ԱՄՆ պետքարտուղարի՝ տարածաշրջան կատարած այցի հետ, սակայն ես կարծում եմ, որ սա ադրբեջանցիների համար լավ առիթ էր ցույց տալու միջազգային հանրությանն ու սեփական ժողովրդին, որ ոչ ոք իրենց համար զսպող ուժ չի կարող հանդիսանալ: Սակայն ինչ էլ լինի, չեմ կարծում, որ Ադրբեջանի նմանօրինակ քայլերը պատերազմի հիմք լինեն»,- կրկին շեշտեց Լարիսա Ալավերդյանը:
Ամփոփելով՝ նախկին պատգամավորը նշեց, որ Ադրբեջանն առաջիկայում պատերազմ չի սկսի՝ կապված էներգետիկ անվտանգության ոլորտում աշխարհի մակարդակով հաստատված հեղհեղուկ իրավիճակի հետ: «Այդ երկիրը կցանկանա իրեն ցույց տալ որպես վստահելի էներգետիկ գործընկեր: Կարևորը, սակայն, այն է, որ Հայաստանը ոչ թե պետք է սպասի հնարավոր զարգացումներին, այլ ինքը ներազդի դրանց վրա»: